LS-ah junevile justice law siamṭhatna tur bill pu lut

Lok Sabha rorel inkhawmah nimin khan Juvenile Justice (Care and Protection of Children) Act, 2015 siamṭhatna tur bill put luh a ni a, he bill-ah hian district magistrate leh additional district magistrate-te chanvo leh mawhphurhna tihsan rawt a ni. 

Congress MP Shashi Tharoor chuan introduction stage-ah bill hi lo dodal mah se, women and child development minister Smriti Irani chuan a point tarlante chu a lo hnawlsak a, a hnuah Juvenile Justice (Care and Protection of Children) Amendment Bill, 2021 chu voice vote hmangin put luh a ni. 

Dan siamṭhatna tur bill siamah hian district tina district magistrate leh additional district magistrate-te chu he dan kalpui a nih dana agency-te hnathawh dan endik tura thuneihna pek an ni a, district child protection unit pawh district magistrate hnuaiah an awm ang. Union cabinet chuan thla liam ta khan dan siamṭhat rawtna hi a lo pawm tawh a ni.

Child welfare committee member turte chu ruat an nih hmain an background leh education qualification-te enfiah hmasak vek a ni ang. Kum sarih tal naupang lam kaihhnawih health, education leh welfare activity-a inhmang lo emaw, child psychology/psychiatry law, social work/sociology/human development lama degree nei emaw a nih loh chuan ruat theih an ni lo ang.