Pakistan-in Indian sangha mantu 34 man

Pakistan chuan India mi sangha mantu 34-te chu an ram tuipui china lutah puhin a man. 

Pakistan Maritime Security Agency thupuangtu chuan sangha mantute hi Thawhlehni khan man an nih thu leh, police kutah an hlan thu a sawi. Judicial magistrate hmaah hruai an ni dawn a, ani hian an awm dan tur chu a relsak dawn a ni, a ti. Tun ṭum hi January thla hnua Pakistan tuipui china kala puha India mi sangha mantu an man lehna hmasa ber a ni. January thla khan Gujarat lam mi panga chu man an ni a, jail-ah an khung a ni. 

Apri 29 khan Pakistan chuan ram pahnihte inkar boruak ṭha a duhna lantir nan Indian sangha mantu 55 leh civil mi panga chu a lo chhuah zalen tawh a ni. Hemi hma hian Karachi-a Landhi leh Malir jail-a tang sangha mantu 250 chuang chu chhuah an ni tawh bawk.

India leh Pakistan hian an ram tuipui china lutah puhin sangha mantute hi an in man sak fo a ni. Ram pahnih hian Arabian Sea-ah maritime border chiang tak an siam loh avang leh, sangha mantute hian a awmna chin hriat chianna tur technology ṭha an neih loh avangin ramri pel hian sangha an man fo a ni.