SC-in Tej Bahadur nomination hnawl chhan sawifiah turin ti

Supreme Court chuan Election Commission hnenah Uttar Pradesh-a Varanasi par­liamentary constituency-a Sa­majwadi Party ticket-a din tum, Tej Bahardur Yadav-a nomination a hnawlsak chhan sawifiah turin a hriattir. 

Border Security Force (BSF)-te ei tur dawn a sawiselna video social media lama a thehdarh avanga sipai aṭanga ban, Tej Bahadur Yadav hian Prime Minister Narendra Modi-a dinna bial, Varanasi-ah inthlan hi chuh a tum a ni.

Mahse Election Commission chuan a nomination paper thehluh hi a hnawlsak a, hei vang hian Supreme Court-ah a zualko ta a ni. 

Supreme Court-a petition a thehluhah, Yadav chuan Varanasi bial aṭang hian PM Modi hi awlsam taka hnehna chantir a nih theihna atan a nomination paper hi centre-a BJP kaihhruai NDA sorkar duhdan angin hnawlsak a ni tih a sawi. 

Election Commi­ssion-in a affidavit thehluh a dik tawk lo nia an sawi pawh hun pek chhungin a sawifiah hman vek tih a sawi bawk. Hetih lai hian SC chuan Congress MP Sushmita Dev-in PM Modi leh BJP president Amit Shah-ten poll code an bawhchhia nia sawi a, an laka action la tura a ngenna chu a hnawlsak. Chief Justice Ranjan Gogoi leh Justice Deepak Gupta awmna bench chuan Dev-i hnenah hian Modi leh Shah-ten campaign laiin Model Code of Conduct (MCC) ṭum eng emaw zat an palzut nia an complaint-na a hnawlsak chungchangah a hrana petition thehlut turin a ti a ni.