NHRC-in cyclone tuarte dinhmun ngaihven turin Odisha sorkar hriattir
National Human Rights Commission (NHRC) chuan Nilaini khan Odisha sorkar hnenah hriattirna a pe a, news report ṭhenkhatah an state-a thlipui, Cylcone Fani tleh tuartu tam takin chhawmdawlna an la dawng lo nia an sawi chu ngaihven turin a ti.
State sorkar hnena hriattirna a pekah NHRC chuan, "Media report-in thlipui tleh tuartu zingah Puri leh Khurdah district hmun ṭhenkhat a mite chuan tun thlengin chhawmdawlna an la dawng lo a, kawtthlerah ni li vel an khawsak tawh avangin chaw leh tui thianghlim pawh an tan a harsa tawh a ni tiin an sawi a ni" a ti. Hemi rual hian chhawmdawlna an dawn loh vanga mipui lungawi lote chu police-te chuan hnawhdarh tumin tiangin an vua nia sawi pawh a awm tih a tarlang bawk.
NHRC chuan state chief secretary hnenah mipuite harsatna tawh chungchang news report chu a rang thei ang bera ngaihven tur leh, an harsatna sutkian dan tur ngaihtuah a, rang taka hma la turin a ti bawk a ni. Kar ruk chhunga report thehlut turin chief secretary chu a hriattir.
May 3-a Odisha state-a Cyclone Fani tlehin chhiatna a thlenah hian mi 41 an thi a, in nuai ruk chuang a len chhe bawk. Thlipui tleh hi mi vaibelchhe 1.48 velin an tuar a ni.