Rajnath Singh-a'n sorkar leh loneitute inbiakna neih a duh

Union defence mi­nister Rajnath Singh chuan Thawhṭanni khan farm law pathum vanga buaina chungchangah sorkar laipui leh loneitute chuan inbiakna nei se ṭha a tih thu sawiin inbiakna hmanga sawifel tur a nih thu a sawi.

Thawhṭanni khan Luck­now-a BJP office-bearer meeting-ah hemi chungchang hi a sawi a, farm law vanga lungawi lo loneitute hnenah ngenna siamin, eng buaina pawh awm se inbiakna hmangin a chinfel theih a ni, a ti. Loneitute chuan MSP tihdanglam a ni dawn lo tih hre thar leh se a duh thu a sawi bawk.

"BJP chuan loneitute sum lakluh a leta tihpun a duh a, MSP hi engtikawng mahin a tawp dawn lo," a ti. Uttar Pradesh BJP executive committee-a thu a sawinaah Rajnath Singh chuan,"Kan vaiin loneitu chhungkuaa mi vek kan ni a, agriculture ṭhatna tur a nih chuan dan siam ṭhata buaina chinfel kan inpeih a ni," tiin a sawi bawk.

Sorkar laipuiin farm law pathum a siam thar duh lohna lantirin loneitute chuan nikum November 26 aṭang khan Delhi border-ah nawrh an huaihawt a ni. Loneitu leh sorkar laipui aiawhte hi inremna zawngin ṭum tam tak inbe tawh mah se, tun thlengin inremna an la siam thei lo. Loneitu lam hian dan siam tharte hi sut leh vek an phut a, mahse sorkar lam hian sut kher loa a ṭul dan anga siamṭhat a inhuam thu a sawi a, hei hi loneitu lamin an pawm thei lo a ni.