April thla tawpah Boris Johnson-a'n India a tlawh dawn
UK Prime Minister Boris Johnson chuan April thla tawpah India a tlawh dawn nia tarlan niin, nimin khan a office chuan hemi chungchangah hian thuchhuah an siam a ni.
Boris Johnson hian India hi a tlawh thei a nih chuan Brexit hnua ram danga a zin hmasak ber a ni dawn a, India ram leh a chhehvel leh UK-in inkungkaihna ṭha an neih theih dan tur chungchang ngaihtuahin India hi a tlawh dawn niin an tarlang.
Johnson hi India-in Republic Day, January 26-a a hmanah khan chief guest tura sawm a ni a, amah pawhin a kal dawn thu sawi lang vek tawh mah se an ramah Covid-19 hri chi thar hmuh chhuah a nih avangin India ram a tlawh leh thei ta lo a ni.
April thla tawpah hian a zin thei a nih chuan India leh UK insumdawn tawnna chungchangah India ram hruaitute inbiakna a neihpui dawn nia tarlang a ni bawk. Indo-Pacific region-a UK sorkarin policy a neih chungchangte chu India rama a zin hunah hian a buaipui dawn a nih hmel.
Britain chuan thla hmasa khan Comprehensive and Progressive Agreement for Trans-Pacific Partnership (CPTPP) zawm dilna a lo thlen tawh a, Association of Southeast Asian Nations (ASEAN)-ah pawh dialogue partner a nih dan tur a buaipui mek bawk.