India rama Saudi Arabia oil supply a tlahniam

India rama oil hralh tam ber ram chu Iraq a ni a, pahnihna ni reng ṭhin Saudi Arabia chu a tlahniam hle niin Reuter chuan a data neih aṭangin a tarlang.

India hian US aṭangin February thla khan oil 545,300 barrel per day (bpd) a lalut a, hei hi January thla aiin 48%-in a tam zawk a ni. Kum 2006 aṭanga India rama oil supply tam pahnihna aia hniam ngai lo Saudi Arabia chu palinaah a ni pha ṭawk a, Refinitiv analyst Ehsan Ul Haq chuan khawvela oil pe chhuak hnem ber US-in oil a mamawhna chu a sang lo hle tih sawiin refinery rate pawh hniamteah an kalpui tawh avangin US crude chu hmun dangah an pek chhuah a ngai a, Asia ramte chu a mamawh nasa ram an ni, tia sawiin, sumdawnna kawnga an boruak avangin China-ah chuan US oil lakluh a ni si lo a, chumi avang chuan India chu an thawn luh tamna ram a ni ta a ni, a ti.

Hetihlai hian Iraq chu India rama oil hralh hnem ber a la nih chhunzawm zel a, January aiin February-a an hralh chu 23% laiin tlahniam mah se 867,500 bpd lai an la thawn lut tho niin an data lakna chuan a tarlang. Iraq leh US hnuaiah hian Nigeria a awm a, 472,300 bpd an thawn lut a, UAE chu pangana a ni thung. India hian February thla khan oil bpd mtd 3.92 an lalut a, hei hi January aiin 18%-in a tlem zawk a ni.

1. Iraq            867,500 bpd

2. US            545,300 bpd

3. Nigeria        472,300 bpd 

4. Saudi Arabia        445,200 bpd