Pathianniah LS inthlan thawh 6-na Constituency 59-ah vote thlak dawn

Lok Sabha inthlanpui thawh rukna chu naktuk, Pathianni hian neih a ni dawn a, state paruk leh Union Territory pakhata Lok Sabha constituency 59-ah inthlanna hi neih a ni ang.

Inthlan hi Bihar, Jharkhand, Madhya Pradesh, Uttar Pradesh, West Bengal leh Delhi-ah neih a ni dawn a, Haryana leh Delhi-a LS seat awm zawng zawngah vote hi thlak a ni ang. Hemi rual hian Tripura West parlia­mentary constituency-a polling booth 168-ah vote thlak ṭhat a ni dawn bawk. 

Inthlan thawh rukna, bial 59-a neih turah hian candidate 979 an awm a, an zingah hian hmeichhia 83 an tel. Heng zinga candidate 967-te affidavit chu zirchian a ni a, midang 12-te erawh an affidavit kimchang Election Commission of India website-ah upload a nih loh vangin zirchian theih a ni lo. 

Candidate zinga 174 chu national party hminga ding an ni a, state party aṭangin 64, registered unrecognized party candidate 422 leh independent candidate 307 an awm a ni. Affidavit zirchianna aṭangin candidate zinga 189 chu criminal case nei lai an ni tih tarlan a ni a, hei hi inthlan thawh ruknaa candidate zinga 20% an tling pha a ni. Inthlan neihna tur bial 59 zinga bial 34 chu red alert constituency an ni a, a awmzia chu heng biala candidate zingah hian criminal case nei lai pathum aia tam an awm tihna a ni. 

Candidate 967 zingah 311 chu crorepati an ni a, candidate zinga 32% chu cheng vaibelchhe khat aia tam nei an ni. Crorepati zingah hian BJP candidate 85% leh Congress candidate 80% an awm. Madhya Pradesh-a Congress candidate Jyotiraditya M.Scindia chu inthlan thawh ruknaa candidate zingah a hausa ber a, a hausakna hi cheng vaibelchhe 374 hu a tling. 

Zirna lamah candidate 395 (41%) chu Class 5-12 inkar thleng zir an ni a, 509 (53%) chu graduate leh a chunglam an ni thung. Hetih lai hian candidate 35 chuan ziak leh chhiar thiam tiin an inziak a, ziak leh chhiar thiam lo candidate 10 an awm bawk. 

Naktuka inthlanna neihna tur Lok Sabha bial 59-ah hian kum 2014 inthlanah khan vote 64.21% a tla. BJP chu bial 59 aṭang hian bial 44-ah an chak a, Congress-in seat hnih lain, Trinamool Congress chuan seat riat an la. Indian National Lok Dal (INLD) in seat hnih an la bawk a, Apna Dal leh SP in seat khat ve ve an la ni. 

Inthlan thawh rukna neihna tur zingah hian prime minister hlui pahnih, Jawarharlal Nehru dinna, Phulpur bial leh Lal Bahadur Shashtri thlan tlin a lo ni tawhna Allahabad bialte pawh an tel dawn. 

Bihar 

Bihar-a Lok Sabha bial pariatah inthlan hi neih a ni dawn a, candidate 127 awmin an zingah hian hmeichhia 16 an tel. Vote nei  1,38,02,576  an awm a, vote thlakna tur polling station 13,793 siam a ni. Inthlanna tur bial pariat zingah  Gopalganj PC bial chu SC tana reserve a ni.  Purvi Champaran leh Vaishali bialah hian candidate an tam ber a, 22 ve ve an awm a ni. 

Haryana-in Lok Sabha seat a neih zawng zawng, seat 10-ah naktuk hian inthlanna hi neih a ni dawn. Vote nei mi vaibelchhe 1.8 an awm a, an zingah hian vote nei thar nuai ruk an tel. Candidate 223 an awm a, vote thlakna tur polling station 19,441 siam a ni.  Kum 2014 Lok Sabha inthlanah khan BJP chu Haryana seat 10 zinga seat pasarihah an chak a ni. Tun ṭum inthlan neihna tura candidate zingah hian chief minister hlui pali tute leh an tuchhuan pahnih an tel. 

Jharkhand-ah chuan bial pali-ah inthlanna neih a ni dawn a, vote nei 66,85,401 an awm. Candidate  67 an awm a, polling station 8,581 siam a ni. 

Madhya Pradesh-a Lok Sabha bial pariatah vote thlak a ni dawn a, candidate 138 an awm a ni. Vote nei 1,04,83,101 an awm a, polling station 13,029 a awm. 

West Bengal-ah chuan inthlan thawh rukna hi bial pariatah neih a ni dawn a, candidate 83 an awm. Vote nei 1,33,69,749 an awm a, polling station 15,248 siam a ni.

Delhi-a Lok Sabha seat awm zawng zawng, seat pasarihah naktuk hian vote thlak a ni dawn. Seat pasarihah hian candidate 164 an awm. Polling station 13,819 siam a ni a, vote nei 1,43,16,453 an awm. Delhi-ah hian Congress, BJP leh AAP-te an inbei dawn a ni. 

Uttar Pradesh Lok Sabha bial 14-ah inthlanna neih a ni dawn a, candidate 177 an awm. Vote thlakna tur polling station 29,076 siam a ni a, vote nei 2,50,68,296 an awm a ni. Vote thlakna tur bial zingah hian Samajwadi Party president leh UP chief minister hlui Akhilesh Yadav-a dinna, Azamgarh bial pawh a tel. Ani bakah hian candidate zingah union cabinet minister Maneka Gandhi pawh a tel.