Nirbhaya case : Pawngsualtute March 20-ah khaihlum dawn

Kum sarih liam taa Delhi-a medical zirlai hmeichhe kum 23 mi pawngsual leh thah thubuai, Nirbhaya case-a thiam loh chantir mi palite chu March 20, zing dar 5:30 a khaihlum turin Delhi Court chuan thupek a tichhuak leh ta. Hei hi tihhlum an nih hun tur a tihchhuah ṭum lina a ni. 

Thiam loh chantir, thi tura hremna pek mi palite zinga mercy petition thehlut hnuhnung ber, Pawan Gupta dilna chu Nilaini khan president Ram Nath Kovind chuan a hnawlsak. President-in Gupta dilna a hnawlsak leh tak avangin, thiam loh changte hian an hremna pumpelh na tura dilna engmah thehluh tur an nei tawh lo. Thiam loh chantirte hi Akshay Thakur, 31, Pawan Gupta, 25, Vinay Sharma, 26, leh Mukesh Singh, 32 te an ni a, thi tura hremna pek an nih hnuah an hremna ngaihtuah ṭha tur hian petition eng emaw zat an thehlut tawh. Mahse an dilna hrang hrangte hi hnawlsak zel an ni. Petition an thehluh avang hian tihhlum an nih hun tur ni erawh ṭum li zet sawn a ngaih phah ta a ni.

 

Heng mi palite leh an thurualpui dang pahnihte hian kum 2012, December 16 zan khan medical zirlai hmeichhia, kum 23 mi chu pawngsualin nasa takin an nghaisa zui a, he hmeichhia hi hemi kum vek December 29 khan Singapore damdawi-inah a  thi a ni. Pawikhawihtu zinga pakhat chu he thil thlen lai hian kum 18 a la tlin loh avangin reform home-ah kum thum dah a nih  hnuin chhuah zalen a ni. 

Pakhat dang, Ram Singh chu jail chhungah a inawkhlum bawk.