ED-in Jet Airways founder chenna in dapsak

Enforcement Directorate (ED) chuan Jet Airways founder Naresh Goyal laka Prevention of Money Laundering Act (PMLA) hmanga thubuai a siamsak hnuah, nimin khan a chenna in an dapsak.

Mumbai-a MRA Marg police station-ah Akbar Travels of India Private Limited chief finance officer Rajendran Neruparambil chuan Goyal leh nupui Anita lakah thubuai a thehlut a ni. Goyal hi cheng vaibelchhe 46 tichingpena apuh a ni a, PMLA bakah hian Indian Penal Code (IPC) hnuaia section hrang hrangah thubuai siamsak a ni bawk.

Kum 1994 aṭang khan Akbar Travels of India Private Limited leh Jet Airways-te hi thawk dunin, an thawh dun lai khan sum lamah harsatna an neih chhoh ṭan avangin, Manchester-Mumbai flight ticket pawh man tlawm takin Jet hian an hralh chhuak a, hei hi an harsatna sut kian nana tih a ni. Heng pawisa te hi a hmanna hriat a nih loh thu FIR thehluhah hian tarlan a ni. 

Nikum March thla khan Jet Airways Chairman aṭangin Goyal hi a bang a, nikum August thla khan rinhlelh thil thuah a chenna in chu ED-ten an dapsak tawh bawk. Goyal hian private company 19 vel a nei nia hriat a ni a, heng zinga panga chu rampawnah a awm thung. Jet Airways hi nikum April 19 khan sum lama harsatna avanga titawp zui a ni.