Covid 19 laka naupangte him nan thuchhuah siam

National Commission for Protection of Child Rights (NCPCR) chuan Nilaini khan India rama state leh Union Territory zawng zawnga chief secretary leh administrator-te chu a ṭul anga school-a Covid 19 hri darh loh nana hma la turin a hriattir.

"Khawvelin Covid-19 hri leng hi a buaipui mek a, India-ah pawh he hri hi a darh chho mek zel a ni," tiin NCPCR chuan India-ah pawh buaipui ṭan a ngaih tawh zia a tarlang. Kum lama la naupang zawkte hian natna hi an kai awlsam ṭhin a, hei vang hian a rang lama hmalak a ṭul thu NCPCR chuan a tarlang bawk.

NCPCR hi CRPC Act, 2005 section 13 (d) hnuaia din a ni a, advisory body an nih angin, ramchhunga State leh UT-te hnenah naupang hriselna kawngah thurawn a pe ṭhin a ni. State leh UT-te hnena thurawn a pek hi State Health Department chuan District Education Officer (DEO)-te hnenah hriattirin, heng DEO-te hian thurawn an dawn angin school-a naupangte him zawk nan hma an la dawn a ni.

Ministry of Health and Family Welfare chuan school kal laia mahni class room loa naupang tam tak punkhawm khap turin a hriattir a, ni 28 kaltaa zirlai emaw zirtirtu emaw school-a hnathawkte chu Covid-19 darhna hmuna zin chu enfiah leh, ni 14 in lama enkawl zui turin a ti bawk.

Nimin khan Ghaziabad-a Covid-19 kai hmuh belh leh a ni a, India ramah he hri kai finfiah tawh zat chu mi 30 an tling tawh a ni. He hri kai hmuh belh hi tun hnaia Iran rama zin a ni. 

China tih loha Covid-19 vanga thi tamna ber ram, Iran-ah hian India mi 1,200 vel  an la tangkhang mek. Union health minister Harsh Vardhan chuan heng mite hruai  kirna tur hian Iran thuneitute nen an inbe mek tih a sawi a, hemi rual hian India chuan Iran-ah hian screening clinic a siam dawn tih a sawi bawk. Minister chuan hri len nasat zualna ram, China, Korea, Japan, Italy leh Iran-ahte zin rih lo turin mipuite a ngen. 

Covid-19 vangin sorkar laipui chuan Asian Security Conference neih tur a ṭhulh. He conference hi Institute of Defence Studies and Analysis (IDSA)-in kum tin a buatsaih ṭhin a, kumin hi a kum 21-na tur a ni. Conference hi March 12-13 chhunga neih tura tih a ni a, mahse institute chuan India leh  khawvel ram hrang hranga Covid-19 leng mek avangin sawn a nih thu a sawi a, a hun pawh la inhriattir leh tur a ni tih a tarlang.