Central Team-in Odisha an tlawh

Cyclone Fani tlehin Odisha state-a thil a tihchhiat hrang hrangte endik turin nimin khan inter-ministerial central team chuan Odisha an thleng.  
Central team hi Ministry of Home-a Additional Secretary Vivek Bharadwaj-a'n a ho a, member pakua an awm. Cyclone Fani tlehin chhiatna a thlenna hmunte tlawha an kal hmain, nimin khan team member-te hi Special Relief Commissioner BP Sethi chuan thil thlen dante a sawipui hmasa phawt a ni. 

Team hi group pahnihah an inṭhen a, Puri leh Khruda district an tlawh ang. Heng district-te hi May 3-a Cyclone Fani tleh tuar nasa zual an ni. Team te hian Bhubaneswar Municipal Corporation area an tlawh dawn bawk a, hemi hnu hian sorkar senior official-te meeting an neihpui ang. Odisha an tlawh zawh hnuah sorkar laipuiah report an thehlut dawn a ni. 

Cyclone Fani hian May 3 khan darkar khata km 240-a nain Odisha hi a nuai a ni. Thlipui tleh hian ruah a ken tel avangin ruah nasa takin a sur zui bawk a, chhiatna a thlen nasa hle. Thlipui leh ruahsurin chhiatna a thlena thi hi mi 64 an tling tawh a, midang 241-in hliam an tuar bawk. 

Nimin thleng khan hmun eng emaw zatah eletricity leh tui supply a la chhia a, thlai chinna ram tak tam a chhe bawk. Meteorologist-te chuan Odisha-a Cyclone Fani tleh hi kum 43 chhunga India rama nipui laia thlipui tleh na ber tih an sawi. Chenna in nuai 1.08 chuang a chhia a, khaw 16,000 chuanga mi vaibelchhe 1.4 velin an tuar a ni. District 140-a thlai chinna ram hectare 1,00,000 a chhe bawk. 

Chief Minister Naveen Patnaik chuan naktuk aṭangin thlipuiin in a tihchhiatte chu enfiah ṭan a ni dawn a, heng in chhiate hi sak ṭhat hna thawhna tur work order chu June 1 ah tihchhuah a ni ang, a ti. Tumah hmaih an awm dawn lo tih a sawi bawk.