PM Modi-a'n Chief Minister-te meeting neihpui

Prime minister Narendra Modi chuan nimin khan video conference hmangin Chief Minister-te meeting a neihpui a, Covid-19 hripui leng mek dinhmunte sawiin, hripui leng thawh hnihna thleng tur dang tura hma lak ṭhat a pawimawh thute a sawi. 

PM Modi chuan, "Hripui leng mek hi tunah kan dang lo a nih chuan, ram pumah nasa takin a darh leh dawn a ni. Hei vang hian hri leng thawh hnihna  thleng mek hi a darh zel lohna turin rang takin chet kan lak a ngai," a ti. "Hri leng do hna kan thawhna kawnga inrintawkna kan lo neihte khan 'overconfidence' ah a chang tur a ni lo," tiin hemi rual hian mipuite tichiai lo zawnga hma lak a ṭul thu PM chuan a sawi. 

PM chuan hri darh zel tur venna atan test neih uar a ṭul thu leh, antigen test aia RT PCR test hmang tam zawk turin a ti a, test neihsak zinga 70% ah tal RT PCR test hi hmang turin a ti a ni. Hri rawn darh chho leh mekna chu khawpui liante a la ni rih tih sawiin, Modi chuan hmun kilkhawr zawkah te a darh chhoh lohna tura theihtawp a ven a ngai a ni, a ti. 

Nimina meeting-ah hian Bengal chief minister Mamata Banerjee chu an state inthlan neih tur atana a campaign avangin a tel thei lo a, Assam-a BJP tana campaign mek Uttar Pradesh chief minsiter Yogi Adityanath pawh a tel lo bawk. Hri leng hluarna state panga zinga mi, Chhattisgarh chief minister Bhupesh Baghel pawh a tel lo bawk a ni. 

Ram chhungah Covid-19 hri kai hi an pung chho leh mek a, Thawhlehni khan hri kai hmuh chhuah thar 29,903 awm belh lehin, hei hi nikum December 11 hnua ni khatah hri kai thar an tam ber ni a ni. Hemi ni vek hian hri vanga thi mi 188 awmin, kumin January 15 hnuah ni khata hripui vanga thi an tam ber ni a ni leh bawk. Thawhlehnia hri kai hmuh chhuah thar zinga 71.10% chu state panga - Maharashtra, Punjab, Karnataka, Gujarat leh Tamil Nadu ami an ni tih union health ministry chuan a sawi a, Maharashtra state bikah hian hri kai thar zinga 61.8% leh thihpui zinga 46% hi an awm a ni. 

Ram puma hri kai mek zinga 76,4% chu Maharashtra, Kerala leh Punjab state ami an ni bawk. Hri leng hi thla khat liamtaah khan state paliah chauh pun lam a pan laiin, Thawhlehnia data tihchhuah aṭanga a lan danin, state 19-ah an pung chho leh ṭan a ni. Ni 10 liam ta chhunga ram chhunga hri kai hmuh chhuah tamna district 19 zinga 15 chu Maharashtra state ami an ni tih union health ministry chuan a tarlang. Sorkar laipui chuan Maharashtra sorkar hnenah an state chuan Covid  hripui leng thawh hnihna a tuar ṭan mek tih hrilhin, hri darh tur venna atana kaihhruaina zawm ṭhat a nih tawk loh bakah,  tracking leh testing pawh a kalpui ṭha lo niin a hrilh.

Thawhlehni khan Covid-19 vaccine pek chhuah ni 60-na niin, hemi ni hian mi nuai 21 chuang ten vaccine hi an la a ni. March 16 thlenga vaccine la tawh hi mi vaibelchhe 3.5 chuang an awm tawh bawk.