Ration card tihtawp sak chungchang sawifiah turin ti

Supreme Court chuan sorkar laipuiin Aadhaar card nena link loh vanga ration card vaibelchhe thum vel a tihtawpsak chu thil ngaihtuah thui ngai tak a ni tih sawiin, hemi chungchang hi sawifiah turin sorkar laipui leh state tin sorkarte a hriattir. 

Chief justice of India SA Bobde leh justice pahnih, AS Bopanna leh V Ramasubramanian awmna bench chuan ration card tam tak tihtawp a nih chungchang petition thehluh chu nimin khan ngaihtuahin, he thil hi a 'serious' hle tih a sawi a, sorkar laipui chu sawifiah ngei turin a ti a ni.

Kum 2019, December 9 khan Supreme Court chuan state hrang hrang sorkar hnenah Aadhaar card neih loh vangin mi tam tak ration pek an ni lo a, hei vang hian rilṭam mangan tak tak leh chaw ei tur nei loa thih phah an awm nia sawi chungchang chu sawifiah turin a lo ti tawh bawk. 

Supreme Court-a petition thehluttu hi Koili Devi a ni a, Jharkhand state-a Dalit chhungkua rethei tak an ni tih sawiin, an ration card leh Aadhaar an link loh avangin tualchhung thuneitute chuan an ration card an tihtawp sak a, kum 2017 March thla aṭang khan ration an lak thei tawh loh thu sawiin, kum 2018, September 28 khan a fanu kum 11 mi, Santoshi chu ei tur nei loin rilṭamin a thi niin a sawi a ni.