Delhi police-ten JNUSU president lakah FIR ziak lut

Delhi police-te chuan Delhi-a Jawaharlal Nehru University Student's Union (JNUSU) president Aishe Ghosh leh midang 19-te chu kar liam ta Inrinni-a varsity-a server room suasama puhin an laka FIR an ziak lut. Hei hi misualten hmaituam chunga university campus luhchilha zirlai leh zirtirtute an beih hmaa thil thleng niin an sawi. 

Aishe Ghosh leh a thawhpuite lakah JNU administration chuan complaint thehlutin, zirlai pawl hruaitute hian fee tihsan duh lohna lantira nawrh an huaihawt ṭumin varsity property te suasamin, security guard-te pawh an bei tel tih an sawi a ni. Pathianni zana misualten JNU campus luhchilh a, zirlaite leh zirtitute an beihnaah khan zirlai 35 velin hliam tuarin AIIMS leh Safdarjung hospital-ah dah an ni a, JNUSU president Ghosh pawh hian a luah hliam a tuar a ni. University campus beitute hi tute nge an ni tih hriatchian a la ni lo na a, zirlaite chuan RSS hnuaia zirlai pawl, ABVP mi leh sate niin an sawi. 

Ghosh chuan misualten university campus an beih hi a hmaa ruahmanna fel tak siamsa veka ti an ni tih sawiin, an mi beih tumte pawh an thliar lawk sa vek a ni, a ti. Pawikhawihna thleng titawp tur hian security duty-te pawh an inrawlh lo tih a sawi bawk. Ni 4-5 kal ta chhung khan campus chhungah pawikhawihna chawk chhuak thei zawngin RSS thlawptu professor leh ABVP te chu an che tawh a ni, a ti. 

University campus chhunga tharum thawhna nasa tak thleng a, zirlai tam takin hliam an tawrh avangin JNU hostel pakhata senior warden chuan banna a thehlut. Sabarmati hostel warden, R Meena chuan banna a thehluhah, zirlaite venhim chu theihtawpin an tum a, mahse an thei lo tih a sawi. Misualte lak aṭanga zirlaite an venhim theih loh avangin a bang tih a sawi a ni. Campus beitu misualte hian Sabarmati, Mahi Mandvi leh Periyar  hostel-te luhchilhin zirlaite leh zirtirtute chu tiang leh thir ten an bei a ni.