Inthlan result puan zawhah Eptu hruaitute inhmukhawm dawn

Lok Sabha inthlanpui neih meka a thawh hnuhnung ber chu May 19 hian neih a ni dawn a, May 23-ah inthlanpui result hi puan a ni ang. Inthlan result puan fel hnuah eptu party hrang hrangte chu New Delhi-ah an inhmukhawm dawn. 

Andhra Pradesh Chief Minister leh Telegu Desam Party (TDP) hotu Chandrababu Naidu chuan eptu party hruaitute hi inthlan result puan hmain an inhmukhawm dawn tih a sawi a, mahse West Bengal Chief Minister Mamata Banerjee-i chuan Naidu hnenah hian result puan hma leh, an seat lak zat hriatchian a nih hmaa meeting lo neih hian awmzia a nei lo tih a hrilh a ni. Hemi hnu hian meeting neih hun tur hi sawn a ni leh ta zawk a ni. 

Delhi-a result puan zawhah eptu party hruaitute meeting neih tur hi Congress party-in a buaipui ang. Kumin February thla khan eptu pawl hrang hrang hruaitute hi an lo inhmukhawm tawh a, hemi hunah hian Congress president Rahul Gandhi, West Bengal CM Mamata Banerjee, Aam Aadmi Party hotu leh Delhi Chief Minister Arvind Kejriwal, NCP President Sharad Pawar, Andhra Pradesh Chief Minister Chandrababu Naidu leh National Conference chief Farooq Abdullah-te an tel. 

Lok Sabha inthlan thawh sariha neih tur zinga thawh ruk chu zawhfel a ni a, seat 543 zingah seat 483-ah vote thlak a ni tawh. A thawh sarihna hi Pathianni hian state pariat-a constituency 59-ah neih a ni ang. Vote tlate hi May 23 hian ram pumah a ruala chhiar a ni dawn a, hemi atan hian Election Commission pawh a inbuatsaih ngawrh tawh hle. Vote chhiarna hi langtlang leh felfai taka kalpui a nih theih nan inbuatsaih mek a ni a, hemi kaihhnawihah hian meeting pawh koh thuai a tum.