SC-in BJP youth leader Priyanka bail dilna phalsak Mamata hnenah ngaihdam dil turin hriattir
Supreme Court chuan kar hmasaa West Bengal Chief Minister Mamata Banerjee-i thlalak siam chawp a thehdarh avanga man, BJP youth leader Priyanka Sharma-i bail dilna chu nimin khan a phalsak. Hemi rual hian Mamata-i hnena ziaka ngaihdam dilna thehlut turin a hriattir nghal bawk.
New York-a MET Gala neihnaa Bollywood star, Priyanka Chopra thlalak chu siam danglamin, a luah Mamata Banerjee-i lu zawk hi dah a ni a, hei hi Sharma chuan a Facebook-ah a share a ni. A thiltih avang hian kar kalta Zirtawpni khan West Bengal police-te chuan an man a ni.
Supreme Court hian West Bengal sorkar hnenah politics lama inkahna lam hawi thlalak share vang ngawtin political leader chu thubuai siamsak theih a ni em tih chungchangah a chhanna pe turin a hriattir nghal bawk a ni. Jutice Indira Banerjee leh Sanjik Khanna-te awmna vacation bench chuan mitinin an ngaihdan sawichhuak leh lantir turin zalenna an nei a, hemi rual hian midang dikna chanvo neihte an va khawih tel a nih chuan a zalenna neih chu a tawp a ni, a ti.