Iran FM a rawn zin

Iran Foreign Minister Mohammad Javad Zarif chuan oil supply chungchang sawipui turin Thawhṭanni zan khan India a rawn thleng. Nimin khan External Affairs Minister Sushma Swaraj-i nen an inkawm nghal bawk. 

Zarif-a hian kumin chhunga India a rawn tlawh ṭum hnihna a ni a, January 7-9 khan a rawn zin tawh a, Prime Minister Narendra Modi a hmu a ni. Iran leh US inkar boruak ṭha lo avangin US chuan Iran chu oil thawnchhuah lamah hrekna a siam a, an thawhpui ram hrang hrangte chu Iran oil leisak lo turin a ti a ni. Hun rei vak lo liam taah khan US President Donald Trump chuan Iran oil leitu ramte ngaihnathiamna an pek chu an chhunzawm tawh dawn lo tih a sawi. US-in ngaihnathiamna a pek ram zingah hian India hi a tel a, US in a tihtawp tak avangin India hian Iran oil a lalut thei tawh lo a, a lei lui a nih chuan US hrekna a hmachhawn ve leh a ngai dawn a ni. 

India hi Iran oil leisaktu ram lian pahnihna a ni a, India oil mamawh zat 10% chu Iran aṭang hian a lalut a ni.