Amit Shah-a roadshow neihnaah BJP leh TMC intibuai Vidyasagar lim suasam a ni

BJP president Amit Shah chuan Thawhlehni khan West Bengal khawpui, Kolkata-ah roadshow a nei a, roadshow a neihnaah hian BJP leh Trinamool Congress-te an intibuai. Buaina chhuak vang hian Amit Shah pawhin a hun hman hi a tihtawi a ngaih phah a, police-ten hmun him lamah an hruai sawn a ni. 

Buaina hi Calcutta University gate bul aṭanga inṭan a ni. Amit Shah-an roadshow a neih lai hian campus chhunga zirlai ṭhenkhat chuan BJP duh lohna thu an lo aukhum a, heng mite hi BJP mi leh sate chuan hmanrua nen an bei a, an intibuai zui a ni. An inkar buaina titawp tur hian police-te an inrawlh nghal a ni. 

Hemi hnu lawk hian Amit Shah-a chuanna motor chu Vidyasagar College a tlan tlang laiin zirlai ṭhenkat chuan duh lohna lantirin, "Go Back Amit Shah" tih thuziak an lo keng bawk. BJP thlawptute chuan heng zirlaite hi an bei zui nghal a, campus chhungah tlan lutin motorcyle lo dingte chu an hal a, Bengal Renaissance-a mi pawimawh, writer leh philospher Ishwar Chandra Vidaysagar-a lim chu an suasam zui bawk.

Police-te chuan buaina chhuak ṭhelh tumin theihtawp an chhuah a, mi eng emaw zat an man a ni. Buaina chhuakah hian hliam tuar an awm nual tih police officer chuan a sawi. BJP president chuan buaina chhuah chhan chu TMC vangah a puh a, West Bengal Chief Minister leh TMC hotu Mamata Banerjee-i chu tharum thawhna thlen tur zawnga midangte fuihah a puh bawk. Hetih lai hian TMC hotu hian BJP chuan buaina siam tum hian a hma aṭangin ruahmanna a lo siam lawk tawh a, Calcutta University campus bei tur hian state pawn lam aṭangin misualte an lalut tih a sawi. 

Buaina chhuah hnuah hian BJP hruaitute chuan Election Commission an hmu nghal a, Mamata Banerjee-i chu a campaign chhunzawm phalsak tawh lo turin an ngen. BJP chuan TMC chet danah lungawi lohna lantir an tum bawk. TMC pawhin Bengal tana mi pawimawh tak lim sausam leh tihchhiat a nih chungchangah Election Commission chu meeting neihpui a tum bawk. Trinamool parliamentary team chuan EC hnenah hian meeting neihpui an duh thu an thlen a ni. 

Mamata Banerjee-i chuan Amit Shah-an tharum thawhna thlen tura midang fuiha a puhna leh, TMC mi leh saten amah beih an tum nia a sawi chu chhangin, Amit Shah chu 'goonda' tiin a sawi. Bahala-a rally a neihnaah Banerjee-i chuan Vidyasagar lim an khawih avangin goonda tih loh theih a ni lo tih a sawi a, an kalphung leh a thil tih dante chuan an huat thu a sawi a ni, a ti. Banerjee-i chuan vawiin hian Vidyasagar lim suasam a nih avanga lungawi lohna lantirna kawngzawh huaihawt a nih tur thu a sawi bawk. 

TMC thupuangtu Derek O'Brien chuan Bengal state pawn lam aṭanga kal BJP misual rualte chuan Vidyasagar-a lim an suasam thu sawiin, heng mite hian Bengal chanchin leh a culture-te engmah an hre lo a, Bengal chuan an thiltih avang hian a ngaidam ngai dawn lo tih a sawi.