BJP hruaituin Mamata laka ngaihdam dil tum lo

BJP youth wing activist Priyanka Sharma chu a Facebook-ah West Bengal Chief Minister Mamata Banerjee-i thlalak siam danglam a share avangin man a nih hnuah Supreme Court thupek angin nimin khan chhuah a ni. SC chuan Sharma hnenah hian Banerjee-i hnenah ziaka ngaihdam dilna thehlut turin a ti bawk. 

Priyanka Sharma-i chuan jail aṭanga chhuah a nih hnuah nimin khan Kolkata-a BJP office-ah press conference a nei a, a thiltih avanga inchhir­na a neih loh thu leh ngaihdam dilna tur eng thil mah a tih loh thu a sawi. BJP activist chuan Alipore jail-a ni nga tantir a nih chhungin tihnawmnah a tawk tih a sawi bawk.