UP-ah Defence Expo 2020 neih a ni dawn
Union defence minister Rajnath Singh leh Uttar Pradesh chief minister, Yogi Adityanath-te chuan Pathianni khan press conference koin "Defence Expo 2020" chu UP khawpui Lucknow-ah February 5-9 a neih a nih tur thu an sawi.
He expo-ah hian ram 70 vel an tel dawn a, prime minister Narendra Modi chuan he expo hi a hawng ang. Nikuma Chennai-a expo neihah khan exhibitor 702 an tel a ni. Kumina neih turah hian international defence manufacturing company 900 chuang an in-register tawh a, expo neihna hmun tur hi square meter 42,000 zeta zau a ni dawn bawk.
"Lucknow-ah hian 'Investors Summit' hlawhtling taka neih a lo ni tawh a, UP hi India rama ralthuam siamchhuahna hmunpui tur atan leh aerospace lama hmasawnna tur hmun atan siam ani ang," tiin thuthar thehdarhtute hmaah Adityanath chuan a sawi. Defense Expo 2020 hi khawvel pum huapa a pawimawh thu leh India rama expo lian ber tur a nih tur thu Adityanath chuan a sawi bawk a ni.