West Bengal: EC-in campaign hun pawt tawi

West Bengal-a Bharatiya Janata Party (BJP) leh Trina­mool Congress (TMC) party inkara buaina nasa tak a chhuah hnuah, Election Commi­ssion chuan Lok Sabha inthlan thawh sarihna neihna tura campaign hun chu Bengal state-ah bik a pawt tawi. 

Thawhlehnia BJP president Amit Shah-a'n Kolkata-a roadshow a neihnaah BJP leh TMC-te hi an intibuai a, motor hal a nih bakah, BJP chuan Kolkata College-a Ishwar Chandra Vidaysagar-a lim an suasam bawk a ni. Lok Sabha inthlan thawh hnuhnung ber chu Pathianni, May 19 hian constituency 59-ah neih a ni dawn. Inthlan thawh hnuhnung ber neihna tur zingah hian West Bengal-a bial pakua a tel a ni. Pathiannia inthlan neih tur atana campaign theih hun hi vawiin tlai dar 5 thleng tur a ni a, mahse buaina chhuak avangin West Bengal-ah hian campaign hun hi nizan dar 10 khan tihtawp a ni. Vote thlak zawh hma chu silence period hman a ni tawh dawn a, public meeting leh electronic media kaltlanga inthlan kaihhnawih lam thil reng reng tihchhuah khap a ni bawk. 

Election Commission chuan Bengal-a constituency pakuaa hman tur thutlukna a siam chungchang hi sawi­fiahin, boruak awmdan chu a ṭhat loh avangin inthlanna neihna tur bialah hian tharum thawhna nasa tak a chhuah mai a hlauhthawnawm tih a sawi. Hei vang hian constitution-a Article 324 hnuaiah a thuneihna hmangin campaign hun tur hi a pawh tawi sak ta tih a sawi a ni. EC chuan West Bengal police ADG (CID) Rajeev Kumar chu sawn turin a ti bawk. Kumar hi Chief Minister Mamata Banerjee nena inhnaihvai tak nia sawi a ni. 

Mamata Banerjee-i chuan EC thutlukna hi na takin a sawisel nghal a, duhsak leh thleibik neiah a puh. EC chuan Prime Minister Narendra Modi-a'n rally a neih tur a phalsak rualin, hruaitu dangte rally neih tur khapna atan he thultukna hi a siam a ni, a ti. 

Party dang hruaituten Mamata thlavang hauh
Bahujan Samaj Party (BSP) hotu Mayawati-i chuan Election Commission chu a sawisel a, Nadrenda Modi-a kaihhruai sorkar a hlawhchham zia thupna atan mipui rilru hruai kawi nan Mamata Banerjee-i bitumah a puh. EC-in Bengal-a campaign hun a pawt tawi chu sorkar laipui nawrna vang a nih thu a sawi a, Chief Election Commissioner hnuaiah Lok Sabha inthlan chu felfai leh dik taka buatsaih a nih loh zia a langchiang hle a ni, a ti. 

Samajwadi Party hotu Akhilesh Yadav pawhin Mamata a thlawp thu a sawi. "EC-in Bengal-a campaign hun a pawttawi hi democracy kalphung kalh a ni. Mamata-i'n democracy palzut zawnga chete a beilet hi ka thlawp tlat a ni", tiin a sawi. Congress party pawhin EC chu a rintlakna leh thuneihna a hloh ta nia a ngaih thu a sawi. Election Commission chuan a constitutional duty chu a thlauhthla tawh a ni, a ti. Andhra Pradesh Chief Minister Chandrababu Naidu pawhin Mamata a thlawp thu hi a sawi a, EC chuan Banerjee-i party harsatna leh vuina te chu a haider sak a ni, a ti.

Hetihlai hian BJP thawhpui Shiv Sena chuan Mamata chu an state chhunga tharum thawhna tichhuak tura boruak siamah an puh thung. 

Mamata-i'n protest march nei
Nimin khan West Bengal Chief Minister leh TMC hotu Mamata Banerjee-i chuan Amit Shah-a roadshow neih­naa tharum thawhna thleng leh, Ishwar Chandr aVidyasagar lim suasam a nih avanga lungawi lohna lantirin protest march a nei. Banerjee-i hian North

Kolkata-ah km 6-a thui kawng a zawh a, party hruaitu leh worker ṭhahnem takin an              ṭawiawm a ni. Mamata-i chuan BJP chu Bengal culture beiah a puh a, an thiltih avang chuan Bengal chuan a ngaidam thei tawh ngai dawn lo tih a sawi a ni.

PM-in Vidyasagar lim siam sak leh tiam
Prime Minister Narendra Modi chuan party pahnihte inkara buaina chhuah ṭuma milim suasam leh tihchhiat tak, Vidyasagar-a lim chu a awmna ngaiah siam sak leh a tiam. Hemi rual hian PM chuan Amit Shah-a rally neihnaah TMC mi leh sate chu mawi lo taka chein, buaina an siam tih a sawi. 

Mi lim tichhetu pawh TMC mite an ni, a ti. A hma pawhin TMC te chu West Medinipur-a a rally neihnaah mawi lo taka an lo chet tawh thu a sawi.