December 2020 hnua hri kai tam ber ni thleng

Union health ministry-in a tarlan danin, Nilaini khan India ramah Covid-19 hri kai hmuh chhuah thar mi 35,886 an awm a, hei hi ni 102 chhung, nikum December thla tir lam aṭanga ni khata hri kai thar an tam ber ni a ni. 

State 16-a district 70-ah March 1-15 chhung khan hri kai thar punna hi 150% chuang a ni pha tih sorkar chuan a sawi a, state 17-a district 55-ah hri kai thar hi 100-150% in an pung bawk. Kar liam ta aṭang khan ram pumah ni khata hri kai thar hi 20,000 chuang an awm chho tawh a ni.

Health ministry chuan Delhi-ah kar khat chhunga hri kai hmuh chhuah thar hi 43%-in a pung a, thihpui zat hi 37%-in an pung bawk niin a tarlang. Nilainia hri kai thar zingah hian Maharashtra state-a mi 23,179 an awm a, nikum September 17 hnua an state-a ni khat hri kai thar an tam ber ni a ni. Maharashtra state hi ram puma hri kai tamna ber state niin, hri kai hmuh tawh hi mi nuai 23 chuang an awm tawh. Ram puma  hri kai mek zinga 60% chu Maharashtra state-a mi a ni bawk. 

Kerala-ah hri kai thar hi 2,098 awmin, Punjab-ah 2,013, Karnataka-ah 1,275 leh Gujarat-ah 1,122 an awm thar bawk a ni. Ramchhunga hri kai hmuh chhuah tawh zinga 400 chuang chu Covid-19 hri chi hran, UK, South Africa leh Brazil-a hri chi thar hmuh ang chi kai an nih thu sorkar chuan a sawi a, an zinga 158-te hi kar liam taa hri an kai tih hmuh chhuahte an ni. March 4 khan Covid-19 hri chi hran kai hmuhte hi ram pumah mi 242 an awm a, mahse nimin thleng khan mi 400 an tling tawh. Heng hri chi hran pathumte hi a inkaidarh a awlsam zawk nia sawi a ni a, a hmaa Covid-19 lo kai tawhte pawhin an kai  nawn leh thei nia sawi a ni bawk. Mahse India ramah chuan Covid-19 kai dam tawhte zingah heng hri chi hran kai nawn hi an la awm lo niin minister of state for health Ashwini Choubey chuan a sawi. 

State-ten khuahkhirhna siam ṭan leh
Hri lengin zual lam a pan chhoh leh avangin Punjab sorkar chuan Class 10 leh 12 board examination neih hun tur a sawn hla. Class 12 board exam, March 22 aṭanga neih tur chu April 10-ah a sawn a, April 9 aṭanga Class 10 board exam neih tur pawh May 4-ah a sawn bawk. 

Maharashtra sorkar pawhin hri darh zel tur venna atan khuahkhirhna a siam leh mek a, Palgar district-ah chuan nimin aṭang khan school leh college te tiam chin awm loin khar tir leh vek an ni. Telangana sorkar pawhin  Covid-19 hripui leng vangin zirna in hrang hrangte khar a ngai leh dawn em tih a ngaihtuah dawn. Hun rei tak hri leng vanga zirna in khar a nih hnuah hawn an ni leh tawh a, mahse tun hnaiah zirlai leh zirtirtu 140 chuangin hri hi an kai thar avangin, zirna inte hi hawn chhunzawm zel a nih dawn leh dawn loh an ngaihtuah ṭha leh dawn a ni.