NSA Ajit leh US Defence Secretary-te inbe dawn

India National Security Advisor (NSA) Ajit Doval leh American defence secretary Lloyd J Austin-te chuan vawiin hian inbiakna an nei dawn a, ram pahnihin defence leh kawng danga thawhdunna ṭha zawk an neih zel dan tur chungchang an sawi dawn.

US defence secretary Lloyd Austin hian vawiin hian India a rawn thleng dawn a, Pathianni thleng a cham ang. Lloyd Austin hian a twitter-ah India ram a tlawh dawn tih leh Union defence minister Rajnath Singh a hmuh dawn thute a lo tarlang tawh a ni. Rajnath Singh bakah India ram national security hruaitute inbiakna a neihpui dawn tih leh US-India defence lama thawhdunna ṭha zawk an neih zel theih dan tur a sawipui dawn tih a tarlang.

India leh US hian inbiakna an neih turah hian China chungchang an sawi ngei rin a ni a, Afghanistan chungchang pawh an sawi ngei rin a ni bawk. Lloyd Austin hi US president Joe Biden-a'n thuneihna a chan hnua an ram top official India tlawh hmasa ber tur a ni.