ECI bench-in West Bengal tlawh dawn

Election Commission of India (ECI) full bench chuan West Bengal chu March 23 hian an tlawh dawn a, assembly inthlan neih tur atana an inbuatsaih dante an enpui ang. 

Official chuan ECI team state official-te meeting an neihpui hlawm dawn tih a sawi a, a bikin inthlan thawh khatna neihna tura mawhphurtute an inbuatsaih dante an enpui dawn a ni. 

Seat 294 awmna, West Bengal Assembly inthlan hi thawh riata neih a ni dawn a, March 27-ah inthlan thawh khatna hi assembly bial 30-ah neih a ni dawn a, a thawh hnihna chu April 1-ah bial 30-ah bawk neih leh a ni ang. Inthlan thawh khatna neih turah hian candidate 191 awmin, a thawh hnihna atan hian candidate 172 an awm bawk. 

Inthlan thawh thumna hi April 6-ah assembly bial 31-ah, thawh lina hi April 10-ah bial 44-ah, thawh nga April 17-ah bial 45-ah, thawh rukna April 22-ah bial 43-ah, thawh sarihna April 26-ah b ial 36-ah leh a thawh riatna hi April 29-ah assembly bial 35-ah neih a ni dawn a, May 2-ah vote tla te chhiarin result puan a ni ang.