CBI-in black money thawnchhuah tam tham tak hre chhuak
Central Bureau of Investigation (CBI) chuan bank account 51 lakah thubuai ziak lutin, heng bank account-te hian kum 2014-15 inkar khan Hong Kong-ah black money cheng vaibelchhe 1,038.34 an thawn luh thu an tarlang.
Bank account 51 zingah hian Chennai aṭanga account nei an tam ber thu CBI chuan FIR an thehluhah an tarlang. Heng bank account-te hi Bank of India, Punjab National Bank leh State Bank of India-ahte a ni tih CBI chuan an sawi a ni. Account 24-te chuan Hong Kong-ah hian an thil lakluhna pawisa Rs vbc 488.39 an thawn thu leh, account dang 27-te chuan an zin manah pawisa Rs vbc 549.95 an thawn thu tarlan a ni bawk.
CBI-in FIR a thehluhah hian mimal hming Mohammed Ibramsa Johney, Zinta Midhar leh Nizamuddin-te sawilan a ni. Anni tih loh bank account dang 48-te hi company account a ni thung. Heng zinga company ṭhenkhatte hi an bungrua emaw thil dang emaw an lakluh leh bank kaltlanga an pawisa thawn chhuah chu a in mil lo tih an tarlang bawk.