Delhi Police hotu thar atan Srivastava ruat Buaina chhuak vanga thi mi 42 an tling tawh

Delhi khawpui hmarchhak lam biala buaina nasa tak a chhuah hnuah, Indian Police Service (IPS) officer SN Shrivas­tava chu March 1 aṭanga thupek dang awm hma chu Delhi Police chief additional charge pek a ni. 

Citizenship Amendment Act (CAA) duh lohna lantirnaah, he dan siam thar duh lotute leh a thlawptute inkara buaina chhuak vangin nimin thleng khan mi 42 an thi tawh a ni. Pathianni aṭang khan buaina hi chhuak ṭanin, police-te pawh an thunun thei lo a, hei vang hian Delhi Police-te demna thu pawh a tam hle. 

Home ministry chuan Delhi khawpui chhunga buaina thunun leh tihtawp a nih theihna tura hma la turin, Ningani khan SN Shrivastava hi Central Reserve Police Force (CRPF) aṭanga lachhuakin, Delhi Police Special Commissioner (Law and Order) ah a dah. Nimin khan Delhi Police chief additional charge hi pek leh niin, vawiina chawl tur Delhi Police hotu Amulya Patnaik a thlak dawn a ni. 

Shrivastava hi 1985-batch officer of Arunachal Pradesh-Goa-Mizoram and Union Territory (AGMUT)  cadre a ni. 

Delhi  hmarchhak lama buai­na nasa tak chhuak chung­chang chhui chiang tur hian Delhi Police chuan Special Investigation Team (SIT) pahnih a din. SIT team pahnih hi Deputy Commissioner of Police (DCP) Joy Tirkey leh DCP Rajesh Deo-ten an ho ve ve ang. Team pakhatah hian Commissioner of Police (ACP), inspector 12, sub-inspector 16 leh 12 Head Con­stable/Constable 12 an awm ang. 

Shiv Sena chuan Delhi-a buaina chhuak chungchangah BJP leh union home minister Amit Shah chu na takin an dem tih sawiin, buaina a chhuah laiin Amit Shah hi Delhi-ah hmuh tur a awm lo, an ti. 

Inthlan dawna campaign laiin Delhi-ah in tinah BJP candidate-te thlawpna pamphlet sema a kal kual theih laiin, buaina chhuak vanga mi tam takin nunna an chan lai khan Shah hi a hmel hmuh tur a awm leh si lo, tiin an party chanchinbua editorial-ah an tarlang. 

Bahujan Samaj Party (BSP) president Mayawati chuan nimin khan President Ram Nath Kovind hnenah lehkha thawnin, Delhi-a buaina chhuak chu Supreme Court judge enpuina hnuaiah high-level judiciary committee chhui tir turin a phut.