India leh Myanmar-in Inremna 10 an ziak

India leh Myanmar chuan Ningani khan in­remna 10 an ziak a, chung zinga pali chu Rakhine state kaihhnawih a ni.

Ni li cham tura India rama rawn zin mek, Myan­­mar president U Win Myint lo zin lai denchhenin inremna hi ziah a ni a, Manipur khawpui Imphal leh Mandalay (Myanmar) inkara bus service tur pawh April 7 aṭanga tlan ṭan tir turin ram pahnihte hian inremna an siam bawk. Hemi atan hian ram pahniha private sector ve vete chuan  memorandum of understanding (MoU) an ziak tel. 

Rakhine kaihhnawiha inremna an siam hi a tlangpuiin Rakhine state hmasawnna tur leh Rohingya raltlante an kir leh theihna tur a ni. Tuialhthei, inbiak­pawhna leh ramngaw humhalha sakei venhim chungchangahte MoU an ziak bawk tih external affairs ministry chuan a sawi.

President U Win Myint hian Ningani khan Rashtrapati Bhavan-ah president Ram Nath Kovind a hmu a, Kovind chuan Myanmar-in ram pahnih inṭhian ṭhatna leh Act East policy a ngaihpawimawh thu inbiakna an neih zawh hian a sawi a ni.

Myint hian a cham chhungin prime minister Narendra Modi leh external affairs minister S Jaishankar-te pawh a hmu bawk a, vawiin hian Myanmar lam a pan leh ang.