Lok Sabha inthlanpui zawh fel a ni ta

Lok Sabha inthlanpui chu Pathianni khan zawh fel a ni ta. 

April 11 aṭang khan inthlan hi neih ṭan a ni a, thawh sariha neih a ni. A thawh hnuhnung ber chu Pathianni khan state pasarih leh union territory pakhatah neih a ni. Inthlan result hi May 23-ah puan a ni ang. Kumina Lok Sabha inthlanpuiah hian vote nei mi maktaduai 900 chuang an awm a, vote thlakna polling station 10,35,918  siam a ni bawk. Election Commission of India-in a tarlan dan chuan, kumin inthlanah hian inthlanpui hmasa, kum 2014 aiin vote nei mi maktaduai 84.3 in an pung a, heng zinga maktaduai 15 chu vote nei thar an ni. Overseas voter 71,735 an awm bawk a ni. Ramchhungah register political party 2,300 chuang an awm a, heng zingah hian national party pasarih leh state party 59 an tel a ni. Tun ṭum inthlanah hian party 50 chuangin inthlan hi an chuh a ni. BJP chu party candidate ngah ber an ni a, candidate 437 an nei. Congress chuan dawtin candidate 421 a nei. BJP hian a ṭum khatna atan Congress party aiin can­didate a ngah zawk a ni. Vote thlakna atan ram pumah electronic voting machine (EVM) hman a ni a, vote thlakna constituency 543-ah voter-verified paper audit trail (VVPAT) system hman vek a ni bawk. Vote thlakna atan hian EVM maktaduai 3.96 leh VVPAT maktaduai 1.74 hman a ni. Election Commission chuan inthlan thawh khatna aṭanga thawh sarihna neih thlengin venhim hna thawk turin paramilitary force 2,70,000 leh state police maktaduai hnih a dah. Inthlanpui neih chhung hian Election Commission hriattirna angin social media platform hrang hrang, Facebook, Twitter leh WhatsApp aṭangin post 909 paih a ni. Heng zinga post 650 chu Facebook aṭanga paih a ni. 'Silence period' puan chhungin dan kalhin politics kaihhnawih thil post 482 zet a awm bawk.Model Code of Conduct hman a nih aṭanga vote thlak tawp ber ni thlengin vote zawnna atana hman tum pawisa, ruihhlo, zu leh thil dang cheng vaibelchhe 3449.12 hu man a ni bawk. Hei hi kum 2014 inthlan vuakveta an man aiin a let thum dawnin a tam a ni. Mipuiten an vote hmangin Lok Sabha seat 545 zinga member 543 an thlang chhuak dawn a, President of India chuan Anglo-Indian community aṭangin member pahnih a nominate bawk ang.Uttar Pradesh chu Lok Sabha-a seat ngah ber a ni a, seat 80 a nei. State hrang hrangte seat neih dan chu - Andha Pradesh 25, Arunachal Pradesh 2, Assam 14, Bihar 40, Chhattigarh 11, Goa 2, Gujarat 26, Haryana 10, Himachal Pradesh 4, Jammu and Kashmir 6, Jharkhand 14, Karnataka 28, Kerala 20, Madhya Pradesh 29, Maharashtra 48, Manipur 2, Meghalaya 2, Mizoram 1, Nagaland 1, Odisha 21, Punjab 13, Rajasthan 25, Sikkim 1, Tamil Nadu 39, Telangana 17, Tripura 2, Uttar Pradesh 80, Utta­rakhand 5, West Bengal 42, Andaman and Nicobar Islands 1, Chandigarh 1, Dadra and Nagar Haveli 1, Daman and Diu 1, Delhi 7, Lakshadweep 1 leh Puducherry 1 a ni. May 23 hian EVM-te chhiar vek an nih hnuah VVPAT chhiar a ni leh nghal dawn. Election Commission thupek angin constituency tinah VVPAT panga zel chhiar tel an ni dawn a, VVPAT pakhat chhiar tel tur hian darkar khat vel hun hman belh zel a ngai dawn a, hei hian inthlan result puan hun tur pawh a tihtlai phah deuh rin a ni. Rampum inthlan result kimchang hi zan dar 10 velah puan chhuah theih chauh rin a ni. Prime Minister Narendra Modi chu rorellai Bharatiya Janata Party (BJP) star campaigner a ni a, eptu party Indian National Congress (INC)  campaign chu party president Rahul Gandhi-a'n a ho bawk. March 11-a inthlanpui neih hun tur puan a ni a, Model Code of Conduct (MCC) hman ṭan a nih aṭang leh inthlan thawh hnuhnung ber neihna tur campaign hun tawp ni, May 17 inkar khan Prime Minister Narendra Modi chuan state 25 leh UT pahnihah rally vawi 144 a nei hman a, hemi hun chhung hian km 1,05,00-a thui a zinkual hman bawk. Congress president Rahul Gandhi chuan he hun chhung vek hian state 23 leh UT pahnihah public meeting vawi 128 a nei hman bawk a ni. Exit poll-ah NDA sorkar leh dawn ?Inthlan zawh fel a nih hnua exit poll hrang hrang buatsaihah BJP kaihhruai NDA chuan sorkarna an siam leh ngei dawn nia tarlan a ni. News18-IPSOS Poll, India Today/Axis My India, Times Now/VMR, Republic TV/Jan ki Baat, leh News24 Chanakya-te chuan NDA hian seat 300 chuang an la leh thei dawn tih an tarlang a, Republic TV/C-Voter leh News Nation NDA hian simple majority neiin seat 300 chu an la pha dawn lo tih an sawi thung. Hetihlai hain ABP/AC Nielson leh Neta App chuan NDA hian sorkarna siam tura seat neih ngai zat, seat 272 a nei pha dawn lo tiin a tarlang ve thung.