Dwarka-a inkahna thlengah mi pahnih an thi

South West Delhi-a Dwaraka Mor metro station-ah Pathianni tlai khan misual pawl pahnihte an inkap a, mi pahnih an thi. Delhi police-te chuan inkahna thlenga thite hi Parveen Gehlot leh Vikas Dalal te an ni a, tualthah, rukruk leh mi sum laksak chungchangah Delhi leh Haryana-ah thubuai eng emaw zat nei lai an nih thu an puang. Police-te chuan pawl pahnih inkara buaina chhuah chhan hi ram inchuh vang tih an sawi. Pathianni tlai dar 4 vel khan mi pathum, car-a chuangte chuan Parveen Gehlot chuanna car hi umin hmun lun laiah an bei a, silai mu 14 vel zetin an kap a ni. He thil thleng vang hian police-te chuan metro station hi an pan nghal a, misualte hi kap letin an zinga pakhat chu an kaphlum tih police official-te chuan an sawi. Silai hmehpuaktu mi pahnihte erawh chu an tlanchhe hman a ni.