CBI-in Mulayam Singh Yadav-te pafa thiam chan tir
Central Bureau of Investigation (CBI) chuan Samajwadi Party founder Mulayam Singh Yadav leh a fapa, Akhilesh Yadav-te chu an sum lakluh phu loa hausaa puhna chungchangah thiam a chantir. CBI hian Supreme Court-ah affidavit thehlutin, Yadav-te pafa laka thubuai ziahluhna turin an puhnaah finfiahna tur ṭha tawk a awm lo tih a sawi. Kum 2005 khan political activist Vishwanath Chaturvedi chuan Supreme Court-ah PIL a thehlut a ni. PIL a thehluhah hian Mulayam, Akhilesh leh a nupui Dimple Yadav, Prateek Yadav-te chu an sum lakluh phu loa an hausak avangin CBI chhui chian tir a, Prevention of Corruption Act hnuaiah thubuai siamsak turin a ngen a ni.Supreme Court chuan kum 2007, March thla khan Yadav-te chhungkua puhna chungchang hi chhui chiang turin CBI hi a hriattir a ni. Kum 2012 kumtawp lam khan court chuan Mulayam, Akhilesh leh Prateek-te laka petition thehluh chu a hnawlsak a, CBI chu an chungthu chhui zawm turin a ti. CBI chuan Yadav chhungkua puhna hi a chhui hnuah Supreme Court-ah thubuai siamsak tura finfiahna ṭha a awm loh thu sawiin, an puhna lakah hian thiam a chantir ta a ni. CBI chuan finfiahna engmah hmuh tur a awm loh avangin kum 2013 khan Central Vigilance Commission hnena report an thehluh hnuah an chhui hna hi tihtawp a nih thu a sawi. Supreme Court-a PIL thehluhah Mulayam hi Uttar Pradesh chief minister a nih lai, kum 1990-2005 inkar khan a hausakna hi cheng vaibelchhe 100 zetin a pung hman nia sawi a ni.