Kerala-ah coronavirus kai pathum an awm tawh

Kar liam taa Kerala-a coronavirus (nCoV) kai pahnih hriatchhuah a nih hnuah, nimin khan Kerala Health Minister KK Shailaja chuan Kerala mi Wuhan Uni­versity-a zirlaiin a kai tih hriat belh leh a nih thu a sawi. 

  

Alappuzha medical college hospital-ah zirlai hi test neih a ni a, test result-ah hian a kai tih hmuhchhuah a ni. 

Coronavirus kai thar nia hriat zirlai hi Kasaragod khuaa Kan­jangad District Hospital-ah enkawl mek a ni. Kerala-ah hian kar liam ta Ningani khan Wuhan University-a medical zirlai hmeichhe pakhat chu India rama coronavirus kai hmasa ber a ni tih hriatchhuah a ni a, ani bakah hian China aṭanga rawn haw tho zirlai pa­khatin a kai tih hriatchhuah bawk a ni. 

An pathum hian an dinhmun a ngaihtuahawm loh thu leh damdawi-ina dah hran an nih bakah uluk taka enkawlna an pek mek thu health minister Shailaja chuan a sawi. China aṭang hian India mi 1,999 vel an lo hawng tawh a, heng zinga mi 1924-te chu uluk taka dah hrana enkawl zui an ni. A dang 75-te hi damdawi-in hrang hrangah enkawl zui mek an ni bawk.

Pathianni thleng khan rampawn aṭanga thlawhtheihna rawn lut 445 aṭanga passenger 58,658 enfiahna neih tawh a ni. Ram 25 velah he natna hi a darh tawh a ni.

Sorkar laipui chuan natna hrik darh mek venthawn thilah China e-visa chu China mi tan leh China rama foreigner mi tan Pathianni khan a ti tawp lailawk a ni. China aṭanga January 15 hnua India-a rawn hawte chu in lama awm turin health ministry chuan thuchhuah a siam bawk.

Hri leng mek chungchang buaipui zui turin sorkar laipui chuan task force a din bawk a, member atan ministry of health, home, civil aviation leh women and child development aiawhte dah an ni tih Union Minister G Kishan Reddy chuan a sawi. Task force hian nimin khan meeting hmasa ber an nei nghal a, hri leng darh tur venna atana hma lak leh inbuatsaih dan turte an sawiho.