Hri kai thar zinga 80.90% state paruka mi an ni

Ram pumah Thawhṭanni khan Covid-19 hri kai thar 40,715 an awm belh leh a, hri kai thar zinga 80.90% hi state paruk - Maharashtra, Punjab, Gujarat, Chhattisgarh, Karnataka leh Tami Nadu-a mi an ni. Union health ministry chuan Thawhṭannia hri kai thar hi a hma ni, Pathianni aiin 13% in an tlem zawk tih a sawi a, hemi rual hian state 10 -  Maharashtra, Punjab, Gujarat, Madhya Pradesh, Delhi, Tamil Nadu, Chhattisgarh, Karnataka, Haryana leh Rajasthan-ahte hri kai hi an pung chho chak hle tih a tarlang bawk. Thawhṭannia hripui vanga thi mi 199 zingah Maharashtra leh Punjab mi 58 ve ve an tel a, Kerala leh Chhattisgarh-ah mi 12 ve ve leh, Karnataka leh Tamil Nadu-ah mi 10 ve ve an thi bawk. Ram puma Covid-19 vanga thi, mi 1,60,166 zingah Maharashtra state mi 53,457 an awm tawh a ni. Health ministry chuan hripui vanga thi zinga 70% chuang chu natna benvawn nei an ni tih a sawi. Punjab-in kum naupang zawkte vaccine pek duhPunjab chief minister Amarinder Singh chuan an state-a sample endik aṭanga hri kai hmuh chhuah zinga 81% chu Covid-19 hri chi dang, UK-a hmuh chhuah, B1117 kai an nih tih a sawi. Covid-19 hri chi dang, B117 hi kum naupang zawkah a darh chak hle nia sawi a ni a, hei vang hian Punjab Chief Minister chuan prime minister Narendra Modi hnenah an state-a kum naupang zawkte Covid-19 vaccine pek phalsak thuai turin a ngen. B117 virus hi nikum November thla aṭang khan UK-ah hian a darh ṭan a, UK-a hri kai hmuh thar zinga 98% leh Spain-a hri kai thar zinga 90% chu B117 virus kai hi an ni. April 1-ah vaccine pek thawh thumna kalpui dawnRam pumah Covid-19 vaccine pek chhunzawm zel a ni a, a thawh khatnaah healthcare leh frontline worker-te pek niin, a thawh hnihna kalpui mekah kum 60 chunglam lam leh kum 45 chin, natna benvawn neite pek mek an ni. Vaccine pek chhuah thawh thumna hi April 1-ah kum 45 chinah neih a ni dawn tih sawiin, union minister Prakash Javadekar chuan kum 45 chingte chu vaccine la tura in register vek turin a ngen. He thutlukna hi coronavirus Task Force leh expert-te thurawn pek anga cabinet-in a siam a nih thu a sawi bawk.