MP CM-in awareness campaign hawng

Madhya Pradesh chief minister Shivraj Singh Chouhan chuan hri kai an pun chhoh leh tak avangin mipuite inveng fimkhur tur leh, Covid-19 protocol-te zawm ṭha tura inzirtirna awareness campaign chu nimin khan siren ti riin a hawng. Chief Minister chuan bazar hmunah siren hi tiriin, minute hnih chhung ngawi rengin an ding zui a ni. Hemi hnu hian mipuite hnenah mask a sem a, fimkhur a ṭul zia a zirtir nghal bawk. He campaign hi tun kar chhung neih a ni dawn a, Covid-19 hri leng a la reh loh thu leh, fimkhur a la ngaih zia inhriattirna atan ni khatah vawi hnih, chawhma dar 11 leh zan dar 7-ah siren hi tih rik ziah a ni ang. CM chuan political party, sakhaw pawl, NGO leh sumdawngte chu Covid-19 hri dona kawngah thawkho vek turin a ngen a, Holi festival pawh chu pawn lamah hmang loa, mahni in lamah lawm mai turin a ngen bawk.