State 18-ah Covid-19 hri chi hrang kai hmu tawh

Union health ministry chuan state 18-ah Covid-19 hri chi hrang kai hmuh an ni tawh tih sawiin, heng zingah hian Britain-a hri chi hrang hmuh chhuah kai 736, South African-a hmuh chhuah ang kai 34 leh Brazil rama hmuh chhuah hri kai pakhat an tel. 

Covid-19 hri chi hrang hmuh belh zel an nih avangin thuneitute chuan international traveller, ram pawn lam aṭanga India rama rawn lutte chu Genome test a lo neihsak zel a ni. Thawhlehni khan ram pumah coronavirus hri kai hmuh chhuah thar mi 47,262 awm lehin, kumin chhunga ni khata hri kai thar tam ber ni a thleng leh.

Hri kai enkawl mek pawh ni 14 chhung chu an pun belh zel tawh a, hri kai mek hi hri kai hmuh chhuah tawh aṭanga 3.14% ah an kai chho leh tawh a ni. Enkawl dam, recovery rate pawh 95.49% ah a tlahniam tawh bawk. Hri lengin zual lam pan chho leh mah se, ram pum huapa lockdown puan tumna erawh a awm lo a, sorkar laipui chuan hri darh zel tur venna atan 'test-track-treat' protocol chu ṭha taka kalpui a ni dawn tih a sawi. Ministry of home affairs (MHA) chuan Thawhlehni khan April thla aṭanga hman tur guideline tichhuak tharin, state tinte chu 'test-track-treat' chu khauh taka kengkawh a, RT-PCR test uar turin a chah. 

Maha-a Beed district-ah lockdown puang dawn
Ram chhunga hri kai tamna leh thihpui tamna ber state, Maharashtra-ah chuan hri kai an la pung chak hle. State chhunga hri kai tam zualna, Beed district-ah chuan March 26-April 4 chung lockdown an puang dawn. 

Beed district collector chuan hri kai an pun chak leh tak avangin lockdown hi puan a ni dawn tih sawiin, district chhunga zirna in zawng zawngte khar a ni dawn a, marriage hall, hotel leh restaurant-te pawh khar an ni ang. Lockdown hman chhung hian private office-te pawh khar vek tur a ni a, in lam aṭanga hna thawk tura tih a ni. Maharashtra state bikah hian Thawhlehni khan hri kai thar 28,000 chuang an awm a, mi 132 an thi bawk a ni. 

Kum 18 chin vaccine pek phalsak turin ngen
Delhi  health minister Satyendar Jain chuan sorkar laipui  hnenah kum 18 chin chu Covid-19 vaccine pek phalsak vek tawh tura an ngen thu a sawi. Minister chuan, "Sorkar laipuiin April 1 aṭangin kum 45 chin tan vaccine lak a remti a, mahse hei hi kum 18 chin tupawhin an lak theih tura phalsak turin kan ngen a ni.

Hei hi kan tih theih chuan khawvel pum tan pawh coronovirus dona leh hri leng hneh a nih theihna turin entawn tur kan siam dawn a ni," a ti. Covid-19 vaccine hi January 16 aṭang khan ram pumah pek chhuah ṭan a ni a, a thawh khatnaah healthcare leh frontline worker-te pek niin, a thawh hnihnaah kum 60 chung lam leh kum 45 chin, natna benvawn neite hnenah pek a ni. April 1 aṭangin a thawh thumna hi kum 45 chinah pek leh tum a ni.