UP-a Nun-te tibuaitute chungah Amit Shah-in hremna pek a tiam

Uttar Pradesh-a Jhansi-ah Zirtawpni khan Nun pahnih chu Akhil Bharatiya Vidyarthi Parishad (ABVP) member ṭhenkhatin lo tibuaiin rel aṭangin an chhuk luihtir a, sakhaw danga midang inlehtirah an puh a ni.

Sakhaw danga midang inlehtirna a thleng lo tih an chhui chiana an finfiah hnuah chauh heng Nun-te hi an chhuahtir leh a, hemi chungchang hi Kerala chief minister Pinarayi Vijayan chuan Union home minister Amit Shah hriattir nghalin hremna na tak lekkawh turin a ngen. Amit Shah chuan nimin khan thuchhuah siamin Nun-te buaina thlentute chuan hremna an hmu ngei dawn a ni tih sawiin, hremna pek ngei a tiam.Chief minister Pinarayi Vijayan chuan,"Hetiang thil thleng hian kan ram hmel a timawi lo hle a, sakhaw chungchanga hmasang aṭang tawha dawhtheihna awm ṭhinte pawh a tihmelhem a ni.

Sorkar laipuiin hetiang thil hi chu na thei ang berin demna a tichhuak tur a ni ang. Pawl leh mimal, kan ram danpuiin zalenna a pek dikna chanvo tibawrhbangtu zawng zawngte lakah hian rawn inrawlh ngei turin ka ngen a che," tiin Amit Shah hnenah ngenna a thlen. Nun-te hi March 19 khan Haridwar-Puri Utkal Express-ah an chuang a, ABVP-te'n an lo tibuai lai video hi social media lamah pawh hmuh tur awmin mipa ṭhenkhatin an hual bakah police-te pawh hmuh tur an awm a ni.Jhansi-a Superintendent of Railway Police chuan Utkal express-ah chuan ABVP member ṭhenkhat Rishikesh training camp aṭanga haw lam chuang an awm nual tih leh Kristian hmeichhe pali chuang ve an awm tih sawiin, chung hmeichhe zinga pahnih chu Nun an ni tih a sawi a; heng Nun pahnihte hian an hmeichhe kalpui dang pahnih chu an sakhuaah an inlehtir niin an ngai a ni, a ti. 

Hmeichhe dang pahnihte chu training nei lai an ni tih leh an certificate a enfiah sak hnuah kum 2003-a baptisma chang ve ve tawh an nih thu a sawi a, sakhaw danga inlet an ni lo tih a finfiah tih a sawi bawk.ABVP hi Rashtriya Swayamsevak Sangh (RSS) student wing a ni a, Nun tibuaitute hi eng hremna nge an pek tih hriat a la ni lo.