BJP kaihhruai NDA sorkar a ding leh dawn BJP-in an chak an lawm

17th Lok Sabha inthlanah Bharatiya Janata Party (BJP) kaihhruai National Democratic Alliance (NDA) chu hneh taka thlan tlin a ni. 

Prime Minister Narendra Modi chu a term hnihna atan prime minister a ni leh dawn. Modi hi kum 50 hnua Lok Sabha-a a zawna term hniha absolute majority nei leh thei hruaitu hmasa ber a ni. 

BJP in an chak an lawm nghal
Bharatiya Janata Party (BJP) chuan nimin chhun khan New Delhi-a an party headquarters-ah hnehna an chan an lawm nghal.

Nimin chhunah khan vote chhiar kal lai mek mah ni se BJP chuan seat 300 chuang zetah hma an hruai avangin party worker tam tak chuan party headquarters-ah hian an chak an lawm nghal a ni. Report ṭhenkhatin an tarlan dan chuan hnehna an chan lawmna nei tur hian mi 20,000 vel an pungkawm a, venhimna pawh uluk taka kalpui chhunzawm nghal a ni.

An chak an lawmnaah hian halpuah leh halmawite nasa takin an hal. New Delhi mai bakah hian ramchhung hmun hrang hranga party office leh khawpui hrang hrangahte an chak hi an lawm a ni. BJP in party chakna lawmna an neihna hmun hrang hrangah hian Prime Minister Modi leh Amit Shah thlalak te, BJP symbol leh flag te pawh hmuh tur a tam hle bawk.

New Delhi-a a lawmna pui ber an hmannaah hian party president Amit Shah leh PM Modi-te pawhin an telpui nghal a, BJP worker-te hian nasa takin an lo lawm a ni. Prime Minister Modi chuan party worker pungkhawmte hmaah thu sawiin, an hnehna chan chu Modi-a tana hnehna ni loin, India ram tana hnehna a ni tih a sawi. An party-in hnehna an chan chu ramchhung middle class, rim taka  hnathawkte tana an hlan thu a sawi bawk. PM chuan tun ṭum inthlana hnehna changtu zawng zawng, eng party ami leh eng bial ami  pawh a lawmpui thu a sawi bawk.

Modi chuan inthlanna felfai tak an buatsaih avangin Election Commission hnenah leh venhim hna thawktu security force-te chungah lawmthu a sawi a, vote thlaktu zawng zawngte chungah pawh a lawm thu a sawi. India-in zalenna a neih hnuah inthlan chu ṭum eng emaw zat buatsaih ni tawh mah se, kumin inthlan anga vote tlak ṭhat a la awm lo tih a sawi. Khawvelin he inthlan hmang hian India ram democratic power chu a takin an hmu ta a ni, a ti. 

BJP president Amit Shah pawhin thu a sawi a, an hnehna chan chu party worker-te inpekna leh thawhrimna vang a ni tih sawiin, an tan an hlan tih a sawi. Inthlan dawna PM Modi-a ngawrh taka a campaign-na chuan hnehna an chan theihna turin nasa takin a pui a ni, tiin a sawi.