Assembly inthlan result puang

Lok Sabha inthlanpui neih ruala state palia assembly inthlan result chu nimin khan tihchhuah ve nghal a ni. State assembly inthlan hi Andhra Pradesh leh Odisha-ah leh, hmarchhak state pahnih Arunachal Pradesh leh Sikkim-ahte neih a ni. 
 

AP assembly inthlanah YSRCP in hnehna chang :
Lok Sabha inthlanpui neih ruala Andhra Pradesh assembly inthlan neih chu nimin khan result puan ve nghal a ni a, Chief Minister Chandrababu Naidu kaihhruai Telugu Desam Party (TDP) an chak zo lo. 

State assembly inthlanah hian TDP leh Jaganmohan Reddy kaihhruai Yuvajana Sramika Rythu Congress Party (YSRCP) chu an inbei ber a ni. Assembly seat 175 awmnaah YSRCP hian seat 148 zet a la pha a, TDP hian seat 26 chiah a la pha thung. 

Kum 2014-a AP aṭanga Telangana state din a nih aṭang khan Naidu-a party TDP hian AP-ah ro an la rel chhunzawm a, mahse kumin inthlanah hian an che chhe hle a, assembly seat 26 chauh an lak phak bakah, assembly inthlan ruala Lok Sabha seat 25-a inthlan neihah pawh seat an la lo. 

CM Chandrababu Naidu chuan an chak loh a pawm thu sawiin, CM a nihna aṭanga banna a thehluh tur thu a sawi. 

AP-a sorkar thar siamtu tur, YSRCP Legislature Party chuan May 25 hian meeting an nei dawn a, kum 46 mi, Jaganmohan Reddy chu leader atan thlangin, May 30-ah chief minister thar atana lakluh a ni dawn a ni.  Jaganmohan Reddy hi kum 2009-a car chesuala thi, AP chief minister hlui YS Rajasekhara Reddy fapa a ni. Kum 2011 khan YSRCP hi a din a ni. 

Odisha-ah BJD sorkar leh dawn :
A term ngana atan Patnaik a CM leh dawn

Odisha assembly inthlan result, nimina tihchhuahah rorellai Biju Janata Dal (BJP) chu thlan tlin nawn leh a ni a, BJP hotu Chief Minister Naveen Patnaik chu a term ngana atan a chief minister leh thei dawn. Assembly seat 146-a inthlan buatsaihah hian BJD, BJP leh Congress party-te chu an inbei ber a ni. BJD hian assembly inthlanah hian party dang thawhpui a nei lo a, mahse party malin seat 110 a la. BJP chuan seat 22 a la a, Congress-in seat 12, CPI(M) leh independent-in seat khat ve ve an la bawk. 
Kum 2014 assembly inthlanah khan BJD hian seat 117 a la a, BJP in seat 10 leh Congress-in seat 16 an la a ni. 

Patnaik hi kum 1997 aṭang khan Odisha Chief Minister a ni a, hemi hnua state assembly inthlan ṭum nga neih tawhah chak loh a la nei lo.