India ram chak leh huap zau zawk kan din dawn : Modi
BJP kaihhruai NDA chuan sorkar a siam leh dawn a, Narendra Modi chu a term hnihna atan Prime Minister a ni leh dawn.
NDA sorkar a ding leh dawn tih a chian hnuah PM Modi chuan a twitter-ah lawmthu sawina a tarlang nghal a, mitin tana hmasawnna an thlen leh mipuiten an rin ngamna chuan hnehna a chantir leh ta tih a sawi a, mipuite nena thawkhoin hma lam an pan zel tur thu te, India ram chak leh huap zau zawk an din dawn thu te a sawi.
Narendra Modi belhchianna
Prime Minister term hnihna chelh tur, Narendra Damodardas Modi hi kum 1950, September 17-ah a piang a, a naupan laiin a pa thingpui dawrah a pui ṭhin a, a hnuah amahin dawr a siam hrang. Kum riat mi lek a nih laiin Rashtriya Swayamsevak Sangh (RSS)-ah telin kum 1971-ah RSS full time worker a ni.
Kum 1985-ah BJP-ah lut chhoin, dinhmun hrang hrang a chelh chho a, kum 2001 khan party General Secretary-ah dah a ni. Kum 2001 khan Gujarat chief minister nilai Keshubhai Patel hriselna ṭhat loh avangin Chief Minister thlaktu atan hian ruat a ni a, a hnuah legislative assembly inthlanah thlan zui a ni bawk. Kum 2001-2014 chhung Gujarat Chief Minister a ni.
Kum 2014 Lok Sabha inthlanpuiah khan BJP prime ministerial candidate tana dah a ni a, a kaihhruaina hnuaiah BJP a che ṭha hle a, kum 1984 hnu lama Parliament lower house-a party mala sorkarna siam thei hmasa ber an ni. Mahse party mala sorkarna siam loin, NDA hnuaia an thawhpuite nen sorkar an siam a ni. Kum 2014 inthlanpuiah Modi hi bial pahnih, Uttar Pradesh-a Varanasi leh Vadodar bialah a ding a, a chak ve ve hnuah Varanasi bial hi a luah zui ta zawk a ni.
Kum 2014, May 26-a Prime Minister atana Modi lakluh a nih khan, prime minister ni tawh zinga India independence hnua piang awmchhun a ni.
National Democratic Alliance (NDA)
National Democratic Alliance (NDA) hi right-leaning political party inzawmkhawm an ni. NDA hi kum 1998 khan Bharatiya Janata Party (BJP) kaihhruaina hnuaiah din a ni a, party 13 a tel a, chairman chu Prime Minister hlui Atal Bihari Vajpayee a ni. Tunah chuan NDA hnuaiah hian party 41 zet an tel mek.
Kum 1998 - 2004 khan NDA hi centre-ah a sorkar a, Vajpayee chu Prime Minister a ni. Mahse kum khat chhung lekin AIADMK-in NDA sorkar a thlawpna a hnuhdawh avangin 1999-ah inthlanpui buatsaih leh nghal a ni a. Hemi ṭum hian NDA hi a hma aiin an chak zawk a, Vajpayee chu a ṭum thumna atan prime minister ni lehin, a term hi a hmang zo a ni.
Kum 2004 Lok Sabha inthlanpuiah khan NDA hian 'India Shining' tih chu auhlaah a hmang a, mahse inthlanah hian seat 186 chauh a la pha a, seat 222 latu Congress kaihhruai United Progressive Alliance (UPA) lakah an tlawm. Kum 2014 inthlanpuiah khan rin phak bakin NDA hi an che ṭha leh a, sorkarna siamin kumin inthlanpuiah hian an dinhmun an sawhngheh belh leh bawk.
Tunah hian BJP hian state 10 - Arunachal Pradesh, Assam, Haryana, Himachal Pradesh, Jharkhand, Manipur, Tripura, Uttarakhand leh Uttar Pradesh-ah sorkarna a siam mek a, state pahnih Goa leh Maharashtra-ah senior partner angin NDA hnuaiah a thawhpui nen sorkar an siam bawk. State dang panga - Bihar, Meghalaya, Nagaland, Tamil Nadu leh Mizoram-ah NDA hnuaia an thawhpui political party dangten sorkarna an siam mek bawk.
BJP Manifesto
BJP hian April 8 khan Lok Sabha inthlanpui neih tur atana an manifesto an tlangzarh a, thlan tlin an niha tihhlawhtlin an tiam hrang hrang 75 zet an tarlang a ni.
BJP-in an manifesto a tihhlawhtlin an tiam ṭhenkhat zingah hengte hi a tel -
• Uniform civil code kalpui
• Ayodhya-a Ram Temple sak a nih ngei theih dan ngaihtuah
• Citizenship Amendment Bill chu Parliament-ah pass a, a taka kalpui
• Entrepreneurial Northeast’ scheme thar hnuaiah MSME tan leh hmarchhak state-a hna siamna tura sum lama puihna dah.
• Chhungkaw tinte pucca house neih tir vek.
• Thingtlanga chhungkaw retheite henah LPG gas cylinder connection pek vek.
• Medical college/postgraduate medical college thar 75 din.
• Loneitute pualin short term agricultural loan Rs nuai khat thleng pek a, hei hi kum 1-5 chhungin a pung awm loa rulh theih dan siam. Kum 2020-ah loneitute sum lakluh a leta puntir theih an tum.
• Ayushman Bharat hnuaiah health and wellness centre nuai 1.5 siam.
• Jammu and Kashmir tana special status pekna Constitution-a Article 370 leh
35A ṭhiah.
Chowkidar to Prime Minister
PM Modi chuan inthlan dawna a campaign-na pakhat atana twitter account hminga 'Chowkidar' tih a telh chu nimin tlai khan a paih nghal a, an pu ber hnung zuiin external affairs minister Sushma Swaraj, finance minister Arun Jaitley, home minister Rajnath Singh, law minister Ravi Shankar Prasad leh textiles minister Smriti Irani-te pawhin twitter-a an hming bula 'Chowkidar' tih an dah chu an paih ve nghal bawk.
Modi chuan, "India ram mipuite chu chowkidar-ah ṭangin he ram tan hian hna ropui tak an thawk a ni. Chi inthliarna, inlak bingna, eirukna leh induhsakna hleihluak do turin 'chowkidar' tih hi symbol ropui tak a lo ni ta a ni. Tunah chuan chowkidar hi sang lehzuala kalpui a ngai ta," tiin a sawi zui. Inthlan dawn khan Modi hian a hming bulah 'Chowkidar' tih hi a telh a, he hming a telh chhan hi India venghimtu a nih vang a nih thu sawiin BJP hruaitu tam takin an hming bulah chowkidar tih an dah ve zui a ni.