BJP-in an dinhmun sawh nghet Congress-in Leader of Opposition dinhmun luah pha lo

17th Lok Sabha inthlan neih zawh takah Bharatiya Janata Party (BJP) chuan a dinhmun a sawhngheh belh zel a, seat 545 awmna Parliament lower house-ah party malin seat 303 zet a nei pha a, inthlan hmasa aiin seat 21 zetin a pun belh. 

Congress party pawhin inthlan hmasa aiin hma sawnin seat 52 la mah se, Lok Sabha-a Leader of Opposition (LOP) dinhmun chelh thei tura seat neih ngai zat, seat 55 chu a la nei pha chuang lo. Hei vang hian term hmasa ang bawkin 17th Lok Sabha hian LOP a nei leh dawn lo a ni. Congress hian United Progressive Alliance hnuaia a thawh­puite nen seat 82 a nei. 

Parliamentary rules hnuaiah Lok Sabha-a LOP dinhmun nei thei tur hian eptu party lian ber chuan seat awm zat aṭanga 10% tal a neih phak a ngai a ni. Tun ṭum inthlanah hian eptu party zingah seat 55 nei pha an awm lo. LOP hi constitutional post a ni a, Central Vigilance Commission, Central Information Commission, National Human Rights Commission leh National Judicial Appointments Commission-ah a tel ve nghal a ni.

Kum 2014 Lok Sabha inthlanpuiah khan rin phak bakin BJP hi an che ṭha a, party malin seat 282 zet an la pha a ni. Kumin inthlanah hma an sawn lehzual a, party malin seat 303 an nei thei a, National Democratic Alliance (NDA) hnuaia an thawhpui party dangte nen seat 349 an nei pha hial a ni.

BJP kaihhruai NDA-in chiang taka hnehna an chan leh hnuah, nimin khan Prime Minister Narendra Modi leh BJP president Amit Shah-te chuan party hruaitu hlun LK Advani leh Murli Manohar-te an tlawh. Modi chuan an party-in tun dinhmun an thlen theihna chu an hruaitu hmasaten kum tam tak chhung party tana an tha leh zung an lo sen tawhna vang a ni, a ti. 

BJP hi Hindi heartland chu an ṭhatna hmun nia sawi a ni ṭhin. Mahse kuminah chuan an chakna huang an zauh nasa hle a, regional party-te chak falna hmun Odisha leh West Bengal-ah pawh an che ṭha hle. Odisha-ah hian seat riat lain,West Bengal-ah seat 18 zet an la thei a ni. 

Kumin inthlanpuiah hian BJP chuan state pasarih leh UT pakhatah Lok Sabha seat awm zawng zawng an hui fai vek. Hengte hi Arunachal Pradesh (2), Gujarat (26), Haryana (10), Himachal Pradesh (4), Rajasthan (25), Tripura (2), Uttarakhand (5) leh Delhi (7)-te a ni. State pathum - Kerala, Tamil Nadu leh Andhra Pradesh-ah erawh seat an la pha lo. Hetihlai hian Congress erawh chu state leh UT 17-ah an artelukawn thung. 

Union cabinet meeting nei
Nimin tlai khan union cabinet meeting neih a ni a, union council of minister meeting-in a zui nghal bawk. Hemi hnu hian Prime Minister Modi chuan President Ram Nath Kovind hnenah banna a thehlut ang. Modi hian cabinet thar siam chungchang chu a minister-te hi a sawipui dawn a ni. Sorkar thar lakluh hun tur erawh an la rel lo a, mahse official-te chuan a rang thei anga tihfel an tum tih an sawi. 

PM hian a cabinet hi a siksawi rin a ni a, BJP president Amit Shah pawh sorkar tharah chuan cabinet-ah dah a ni tawh dawn nia sawi thawm pawh a awm. Minister pathum Hardeep Puri, KJ Alphons leh Manoj Sinha-te chu an chak zawh loh avangin mi thar an awm belh ngei dawn a, Congress president Rahul Gandhi hnehtu Smriti Irani-i pawh chanvo pawimawh zawk chelh tura rin a ni bawk.