NDA leader atan lungrual takin Modi-a thlang President-in sorkar siam turin a sawm

Bharatiya Janata Party (BJP) kaihhruai National Democratic Alliance (NDA) chuan kar kalta Inrinni khan Prime Minister Narendra Modi chu lungrual takin NDA leader atan an thlang. 

New Delhi-a Central Hall-ah board meeting hi neih a ni a, BJP president Amit Shah chuan Narendra Modi chu BJP Parliamentary party leader atan a rawt a, he rawtna hi Union Minister for Road Transport and Highways hlui Nitin Gadkari leh Union Home Minister hlui Rajnath Singh-te'n an thlawp a ni. 

Hemi hnu hian Punjab Chief Minister leh Shiromani Akali Dal (SAD) hruaitu Prakash Singh Badal chuan Modi chu NDA parliamentary party leader atan a rawt ve leh a, Bihar Chief Minister Nitish Kumar leh Shiv Sena leader Uddhav Thackeray-te'n an lo thlawp a ni. NDA hnuaia party hrang hrang hruaitute chu thutlukna siam tura tih an nih hnuah, lungrual takin Modi chu NDA leader atan an thlang ta a ni. 

President-in sorkar thar siam turin a sawm
17th Lok Sabha inthlanpui neih zawh takah BJP kaihhruai NDA hi hneh taka thlan tlin an ni a, a term hnihna atan Prime Minister Modi-a kaihhruai NDA sorkar a ding leh dawn a ni. 

Kar kalta Inrinni vek khan President Ram Nath Kovind chuan 16th Lok Sabha ṭhiahna tur thupek a tichhuak. BJP hruaitute leh an thawhpui party hruaituten President hnenah sorkarna an siam theih thu leh BJP Parliamentary Party leader atana Modi thlan a nih thu an thlen hnuah, President hian Modi chu sorkar thar siam turin a sawm nghal a ni. 

President chuan sorkar siam tura Modi a sawm rual hian, union council of minister atana a ruatte hming pawh hriattir turin a ti nghal bawk. Sorkar thar lakluh hun hi la tichiang lo mah se, May 30-ah hian lakluh rin a ni. Modi hian a cabinet minister turte hi la ruat fel lo mah se, Finance Minister hlui Arun Jaitley leh External Affairs Minister hlui Sushma Swaraj-i te chu an hriselna ṭhat tawk loh avangin cabinet tharah hian an tel tawh lo mai thei nia sawi a ni. Hetih lai hian BJP president Amit Shah erawh chanvo pawimawh tak pek rin a nih thu tarlan a ni a, mahse party chuan Shah hi BJP president-a a awm zui zelin an party tan a ṭha zawk nia an ngaih thu report a awm bawk.