MP atana thlan thar zingah 50% dawnin criminal case nei

17th Lok Sabha member atana thlan thara zahve dawn, mi 233-te chu criminal case nei lai an ni. 

National Election Watch leh Asso­ciation for Democratic Reforms (ADR) -ten Member of Parliament (MP) thlan thar mi 542 zinga mi 539-te affidavit thehluh an zirchianna aṭanga a lan danin an zinga 233 hi criminal case nei lai an ni. An zingah hian kum 2006-a Malegoan-a bomb tihpuahnaa inhnamhnawiha puha thiam loh chantir tawh, BJP ticket-a thlan tlin Pragya Thakur-i pawh a tel a ni. 

Kum 2014 inthlanpuiah khan MP atana thlan thar zinga 34% chu criminal case nei lai an ni a, kum 2009-ah khan criminal case nei lai thlan tlin chu 30% an ni bawk. Kumina criminal case nei lai MP thlan thar mi 233 zinga 29% chu thubuai rip tak, pawngsual, tualthah, tualthaha tuma puh, mi rukbo leh hmeichhe laka pawikhawihna thlen thubuai nei lai an ni. MP 10 chuan an thubuaiah hian thiam loh chantir an ni tih an tarlang bawk. 

MP term khatna hmang tur Mi 300 an awm
Kumina Lok Sabha member atana thlan thar mi 542 zingah mi 300-te chuan MP term khatna an chelhna tur a ni. 16th Lok Sabha-a member nilai 197-te chu thlan nawn an ni a, midang 45-te chu a hma lama Lok Sabha member lo ni tawhte an ni. 

Hmeichhe MP 78 awm
MP 542 thlan thar zingah hmeichhia 78 an awm. Hmeichhe MP awm zat hi 14% an tling a, hei hi kum 1952 hnua Lok Sabha-a hmeichhe MP an tam ber ṭum a ni.  

Inthlanah khan ram pumah hmeichhe candidate 724 an awm a, Congress-in hmeichhe candidate 54 neiin, BJP-in 53 an nei. Uttar Pradesh leh West Bengal aṭangin MP atan hian hmeichhia 11 ve ve thlan tlin an ni. Biju Janata Dal (BJD) MP zinga 42% chu hmeichhia an ni. 

16th Lok Sabha-ah khan hmeichhe MP 64 an awm a, 15th Lok Sabha-ah 52 an awm thung. 

MP zinga naupang ber kum 25 mi
Lok Sabha member atana thlan thar zingah kum 25 mi, engineering graduate Chandrani Murmu-i chu a naupang ber. Murmu-i hi Odhisha-a tribal bial, Keonjhar aṭangin Biju Janata Dal (BJD) ticket-in thlan tlin a ni. 

Chandra Murmu hian MP term hnih lo chelh tawh, BJP candidate Ananta Nayak chu vote 55,203 in a hneh. A ngaih pawimawh ber tur chu an bial chhunga hna tam zawk siam a nih thu sawiin, industry thar din turin a theih ang angin hma a la dawn tih a sawi. 17th Lok Sabha member-te kum chawhrual hi kum 54 a ni a, kum 40 hnuai lam 12% an awm. Hmeichhe MP-te kum chawhrual chu mipa MP-te kum chawhrual aiin kum rukin a hniam zawk.

MP zingah graduate 394 an awm
MP thlan thar zinga 394-te chu an zirna lamah graduate level an ni a, member awm zat aṭangin 72% an tling. Class12 pass chu 27% an awm bawk.