Congress-in Rahul Gandhi-a banna pawm lo

Congress president Rahul Gandhi chuan Lok Sabha inthlanpui neih zawh takah an party an chet ṭhat tawk loh avangin party president a nihna aṭangin ban a tum a, mahse hei Congress committee sang Congress Working Committee chuan a pawm lo. 

CWC hian kar kalta Inrinni khan meeting an nei a, he hunah hian Gandhi-a ban tumna hi an pawm lo tih an sawi. Hetihlai hian Rahul Gandhi hian party hotu atan Gandhi chhungkua ami ni lo awm se a duh tawh nia sawi a awm bawk a, committee sangin a ban tumna hi pawm lo mah se a la sut duh lo nia sawi a ni. 

Meeting-ah hian CWC chuan resolution siamin, "Congress president-in ban a tumna chu lungrual takin kan hnawlsak a ni. CWC chuan Congress president chu party-in India ram ṭhalai, loneitu, SC/ST/OBC, minority, mi rethei leh dinhmuh chhe zawkte chawisanna tura a thawhnaah  kaihruai zel turin kan ngen a ni," an ti. 

Resolution-ah hian inthlanah Congress chu chak lo mah se, ramchhunga inhuatna leh inṭhendarhna siam zawnga thiltihte theihtawpin an do chhunzawm zel dawn a, an inpekna, huaisenna leh tumruhnate chu a hma aiin a chak zawk a ni, tiin an tarlang.