Thla 5 chhunga hri kai thar tam ber ni thleng

India ramah Nilaini khan Covid-19 hri kai thar mi 53,476 an awm belh leh a, thla nga chhunga ni khata hri kai thar an tam ber ni a ni. 

State pahnih - Maharashtra leh Gujarat-ah hri kai thar an pung zual a, India rama Covid-19 hripui a len hnuah Nilaini khan an state-a ni khata hri kai hmuh chhuah tam ber a ni ve leh bawk. Maharashtra-ah hri kai thar hi mi 31,855 awmin, Gujarat-ah mi 1,790 an awm. 
Nilainia hri kai thar hi a hma ni, Thawhlehnia hri kai aiin 13% an pung. 

Kum 2020, October 23 khan hri kai thar mi 54,366 awmin, hemi hnua ni khata hri kai thar an tam ber ni chu Nilaini kha a ni. Maharashtra leh Gujarat bakah Punjab, Kerala, Karnataka leh Chhattisgarh-teah hri kai an pung chak chho hle. Hri leng a hluar chho leh a, hri kai enkawl mek pawh an pung chak hle. Hri kai mek zinga 74.32% chu state pathum - Maharashtra, Kerala leh Punjab-a mi an ni. Maharashtra bikah hian ram puma hri kai mek zinga 62.91% an awm a ni. 

India ram chauh ni lo, ram dangah pawh Covid-19 hri leng hi a hluar chho leh mek a, John Hopkins University data-in a tarlan danin, Nilaini thleng khan khawvela coronavirus hri kai hmuh chhuah tawh hi mi 12,48,38,531 an awm tawh a, hri kai zinga mi 27,44,837 in an thihpui tawh. 

US chu Covid-19 kai leh thihpui tamna ber ram a ni chhunzawm zel a, hri kai hmuh tawh hi mi 3,00,10,933 awm tawhin, an zinga mi 5,45,281 in an thihpui tawh a ni. US dawtah Brazil, India, Russia, France, UK, Italy, Spain, Turkey leh Germany ramte chu hri kai tam zualna ram an ni. 

Apri thla chawhnu lamah Hri leng thawh hnihna 'peak' thlen ring
State Bank of India (SBI) report tihchhuah chuan, ram chhunga hri leng thawh hnihna thleng mek 'peak' chu April thla laihawl velah a thlen a rinawm thu a tarlang. 

March 23 thlenga ram chhunga hri len dan an chhut aṭangin, hri leng thawh hnihnaah hian mi nuai 25 velin hri an kai a rinawm thu an tarlang a, hri leng thawh khatna thlenga nitina hri kai thar dinhmun leh a peak level a thlen hunte chhutin, April thla chawhnu lamah hri leng thawh hnihna 'peak' hi thleng turin an ring a ni.

Mask vuah lote sum chawi Rs vbc 4 tling tawh
Mumbai police-te chuan February 20 aṭang khan khawpui chhungah face mask vuahlote sum an chawi tir aṭangin cheng vaibelchhe li an hmu tling tawh tih an sawi. 

Police thupuangtu DCP S Chaitanya chuan, mi nuai hnih vel mask vuah loh vangin sum chawi tir an ni tawh tih sawiin, an sum hmun zinga a zahve hi Brihanmumbai Municipal Corporation (BMC)-ah chhun luh a ni ang a, a zahve dang chu police welfare activities atan hman a ni dawn tih sawiin, mask vuah lote dap chhunzawm zel an nih tur thu a sawi bawk. 

Mumbai khawpuiah hian Nilaini khan hri kai thar 5,185 an awm a, khawpui chhungah containment zone-a puan hmun 39 awm bawkin, heng zingah hian mi retheite chenna slum area te pawh a tel a ni.