Farmer union-ten vawiinah Bharat Bandh huaihawt dawn

Sorkar laipuiin farm law thar pathum a siam duh lohna lantira nawrh huaihawt mek, loneitu pawl chuan vawiin hian ram pum huap, Bharat Bandh an huaihawt dawn. 

Loneitu pawl, Samyukta Kisan Morcha (SKM) chuan an bandh huaihawt hi a hlawhtling ngei theihna tura thlawp turin ram mipuite an ngen. Thuchhuah siamin, SKM chuan vawiin hi loneituten farm law duh lohna lantira nawrh an huaihawt ṭan aṭanga a thla lina a ni tih sawiin, zing dar 6 aṭanga zan dar 6 thleng bandh hi huaihawt a ni dawn a, road leh rel transport-te bakah bazar leh public place-te chu khar vek a ni dawn tih an sawi. 

Bharatiya Kisan Union (BKU) president Rakesh Tikait chuan, "Prime minister Modi chuan kan thlai tharte chu khawi hmunah pawh kan hralh thei dawn tih a sawi a, a thusawi finfiahna atan hian state assembly, collector office leh Parliament-teah kan la zuar dawn a ni," a ti. Farm law sut tura an nawrna chu an tawpsan mai dawn lo tih sawiin, sorkar laipuiin heng dan tharte hi a sut hma chuan khawpui hrang hrangah duh lohna an lantir chhunzawm zel tur thu a sawi bawk. 

Ganganagar Kisan Samiti hruaitu, Ranjit Raju chuan vawiina Bharat Bandh an huaihawt bakah, March 28-a Holi hman rualin farm law thar pathum copy hi an hal dawn tih a sawi. Sorkar laipui chuan rilru fim tak puin heng dan a siam thar pathumte chu a sut leh a, MSP hman chhunzawm zel a nih tur thu ziaka a tiam ngei pawh an beisei tih a sawi. 

Loneituten Bharat Bandh an huaihawt tur hi organised leh unorganised sector hnuaia trade union hrang hrang bakah agricultural workers union, transporter assocation, teachers' association, youth leh students assocation-te chuan an thlawp thu an lo sawi tawh a ni.