Manipur Congress aiawhten President an hmu

Manipur Congress aiawhte chuan an state-a BJP kaihhruai ṭangrual sorkarin Parliamentary secretary atana MLA 12 a ruatte ban tura an phut chungchangah Nilaini khan president Ram Nath Kovind an hmu. 

President hmutu zingah hian AICC in-charge of Manipur Bhakta Charan Das, Manipur Pradesh Congress Committee (MPCC) Govindas Konthoujam leh AICC member Gaikhangam te an tel. Congress party hian kum 2017-a rorellai MLA 12-a parliamentary secretary atana ruatte hi 'office of profit' case-ah ban turin an phut a ni. Election Commission of India pawhin an ngaihdan a ṭawmpui hnuah pawh state governor Najma Heptulla chuan hma a la duh lo niin an sawi. 

President hnenah hian me­mo­­­randum thehlutin, Cong­ress member-te chuan MLA 12-te chungchangah ECI report a bawhzui loh avang leh, High Court thupek a zawm loh avangin Manipur Governor chuan a tih­tur a ti lo niin an sawi. President hnenah hian Constitution of India-a Article 192 hnuaia Governor-in a mawhphurhna neihte hlen tura hrilh turin an ngen a ni.   

Memorandum an thehluhah hian chief minister Biren Singh chuan Manipur Parliamentary Secretary (Appointment, Salary and Allowance and Miscellaneous Provisions) Act, 2012-a Section 3 in thuneihna a pek hmangin a kaihhruai sorkar thlawptu party hrang hranga MLA 12-te parliament secretary atan a ruat tih sawiin, heng mi 12-te hi minister status pek an nih bakah minister-ten hamṭhatna an dawn ang pawh an dawng ve vek a ni, an ti.

MLA 12-te hi ban an nih chuan CM Biren Singh kaihhruai BJP sorkar hian assembly-ah thlawptu a ngah tawk tawh dawn lo a, hei vang hian HC thupek pawh hi kenkawh a ni lo.