May 30-ah PM atan Modi lalut dawn

May 30 hian Prime Minister thar atan Naren­dra Modi leh a council of minister-te chu rinawmna thu tiam tira lakluh an ni dawn. 

Lok Sabha inthlanpui neih zawh takah Modi-a party, Bharatiya Janata Party (BJP) chu hneh taka thlan tlin an ni a, party malin seat 303 zet an la pha. BJP kaihhruai NDA hian seat 353 an la a ni. 

President office aṭanga official thuchhuah chuan President Ram Nath Kovind-a'n May 30 hian Rashtrapati Bhavan-ah Prime Minister leh Union Council of Minister-te chu rinawmna thu a tiam tir dawn tih a sawi. 

Sorkar thar lakluh tur hi kum 2014-a an lo tih tawh angin, mi tam zawk an tel theihna turin Rashtrapati Bhavan tualah neih a ni zawk dawn nia sawi a ni. Kum2014-a lakluh a nih dawn khan Modi chuan South Asia ram hrang hrang hruaitute leh Maldive prime minister a sawm a ni. Tun ṭumah pawh hian ram dang hruaitute eng emaw zat sawm an nih leh rin a ni a, mahse foreign ministry chuan a tel turte hi a la tichiang lo. 

17th Lok Sabha session hmasa ber June 6-15 ah
Sorkar thar lakluh a nih hnuah 17th Lok Sabha hmasa ber chu June 6 aṭangin neih ṭan a, June 15 thleng neih a ni ang. Cabinet thar lakluhte chuan May 31 hian Parliament session hmasa ber neih hun tur hi an tichiang dawn a ni. 

Session hmasa berah hian rorel inkhawm ṭum ruk neih a ni dawn a, BJP kaihhruai NDA chuan session chhung hian majority an nei tih an fiah bawk ang. 

Modi-a'n Varanasi a tlawh
Prime Minister Naren­dra Modi chuan nimin khan a parliament constituency, Uttar Pradesh-a Varanasi a tlawh. Varanasi-ah hian Modi hi vote nuai 4.79 zetin a chak a ni. A bial ngai a hum mai a ni lo a, kum 2014 inthlan aiin kumin inthlana a chakna hi vote nuai khat dawnin a tam a ni. 

Modi chuan Ganga lui kama Kashi Vishwanath temple a tlawh a, hemi hnu hian BJP worker te hmaah thu a sawi zui bawk. BJP president Amit Shah leh Uttar Pradesh Chief Minister Yogi Adityanath-te'n Modi hi an ṭawiawm a ni. Pathianni khan Modi hian Ahmedabad-ah a nu, kum 98 mi chu a tlawh bawk.