Kum 2021-22 ah NDA-in RS-ah majority neih beisei

Lok Sabha inthlanpui neih zawh takah Bhara­tiya Janata Party (BJP) kaihhruai National Demo­cratic Alliance (NDA) chuan seat 353 zet lain clear majority an nei. Rajya Sabha-ah pawh kum 2021-22 hian NDA chuan majority an neih theih tawh rin a ni. 

Rajya Sabha-ah hian BJP kaihhruai NDA hian majority hi MP 24 in an la pha lo a ni. Member 245 awmna Rajya Sabha-ah hian BJP hi party lian ber an ni tawh a, member 73 an nei. An thawhpui party dang, JDU-in 6, SAD-i 3, Shiv Sena-in 3 leh RPI-A in pakhat an nei a, NDA member neih zat hi 86 a ni. Member 13 nei AIADMK chuan pawn lam aṭangin NDA hi an thlawp bawk a, hei nen hian member 99 an nei thei a ni. Rajya Sabha-a majority nei tur hian member 123 neih phak a ngai a, hei hi member 24 chauhin an phak lo tawh a ni. 

Hetih lai hian regional party TRS, YSRCP leh BJD te chuan an thu khel a zirin NDA hi an thlawp thei bawk. Inde­pendent member paruk te thlawpna nen, BJP chuan kum 2021-ah Rajya Sabha-ah hian majority an nei thei tawh dawn tih an sawi a ni.  
NDA-in Rajya Sabha-a majority an neih theih hunah chuan Prime Minister Narendra Modi-a kaihhruai sorkarin dan a siam leh pass kawnga harsatna a tawh ṭhinte a reh thei tawh dawn a, House pahnihah eptute puihna dil ngai loin awlsam takin an tlang thei tawh ang. 

Kumin chhungin Assam-ah RS seat pa­hnihah inthlan buatsaih a ngai dawn a, heng seat pahnihte hi Congress party chelh mek lai ni mah se inthlan neih zawh takah Assam-ah hian BJP an chak avangin RS term tharah hian BJP in an lak tawh ngei rin a ni. Kum 2020-ah Uttar Pradesh, Maharashtra, Assam, Jharkhand, Haryana, Rajasthan leh Himachal Pradesh-ahte seat 55 ah inthlan a ngai dawn bawk a, seat tam zawk chu NDA-in an lak rin a ni.