AICC President aṭanga ban a tum chungchangah Priyanka Gandhi-i'n Rahul Gandhi a hmu

Lok Sabha inthlanpui result puan zawh taka Congress chet ṭhat tawk loh avangin All India Congress Committee (AICC) President Rahul Gandhi chuan ban a tum tih a sawi a, hemi chungchangah hian a farnu AICC General Secretary Priyanka Gandhi chuan Rahul-a hi a hmu. 

Congress party thuneitu sang, Congress Working Committee (CWC) chuan Rahul Gandhi-a ban tumna hi a hnawlsak a, mahse hetichung hian Rahul chuan ban hi a la tum tho nia sawi a ni. Hei vang hian a farnu, party general secretary Priyanka Gandhi Vadra chuan Rahul Gandhi hi a chenna inah Thawhlehni zingah khan a hmu a, Rajasthan Chief Minister Ashok Gehlot leh a deputy Sachin Pilot, Congress spokesperson Randeep Surjewala-te chuan an ṭawiawm a ni.

Rahul-a ina Congress hruaituten meeting an neih zawh hnuah hian thuthar thehdarhtute chuan CWC meeting neih a ni thuai mai thei tih an sawi. Hetihlai hian Congress hruaitu KC Venugopal chuan hei hi a pha thung. Chiang taka Congress an chak zawh loh hnu hian state ṭhenkhata party president-te chuan president an nihna aṭanga banna an thehlut tawh hlawm bawk a,  heng zingah hian Assam, UP, Odisha leh Maharashtra president-te pawh an tel.

Lok Sabha inthlanna neih zawh takah khan BJP chuan seat 303 an lak laiin Congress chuan seat 52 chiah an la phak a ni.