Bengal sorkarin Vidyasagar lim tihchhiat dan chhuitu tur din
West Bengal sorkar chuan tun thla tir lama Kokalta-a Bharatiya Janata Party (BJP) rally neih laia Bengal tana mi pawimawh, social reformer Ishwar Chandra Vidyasagar-a lim tihchhiat a nih dan chhui chiangtu tur member panga awmna committee a din.
Panel hi Home Secretary atana ruat thar Alapan Bandyopadhyay-an a ho dawn a, member-ah hian Kolkata Police Commissioner Anuj Sharma, Additional Commissioner of Police Jawed Shamin leh Principal of Vidyasagar College Goutam Kundu-te pawh an tel ang.
Chief Minister Mamata Banerjee-i chuan inthlanpui neih laiin misualten Vidyasagar College compound chhunga Vidyasagar lim an tihchhiat thu sawiin, he thil titute leh an thil tih chhan chu chhui chian a ni dawn a ni, a ti. CM chuan he pawikhawihna thleng kaihhnawihah hian FIR pahnih ziahluh a ni tawh a, mi 35 man an ni tawh tih an sawi bawk.
BJP president Amit Shah-an May 15-a Kolkata-a rally a neih ṭumin BJP leh Trinamool Congress (TMC) member-te an intibuai a, BJP worker-te chuan college campus chhunga Vidyasagar lim chu an tichhia a ni. He lim tichhetuah hian BJP leh TMC-te hi an inpuhtawn a ni.
Amit Shah chuan he milim hi college campus chhungah a awm a, college gate pawh tihchhiat a nih loh vangin TMC worker-ten tichhiain BJP an puh zawk tih a sawi. Mahse TMC general secretary Partha Chatterjee chuan BJP t-shirt haten milim tichhia a, leia an paih lai lanna video a tlangzarh thung.